PH Spikers lumakas ang tsansa dahil sa pag-atras ng Alsahel sa AMCC

MANILA, Philippines -  Lumakas ang tsansa ng Philippine Team na makaabante sa susunod na round matapos umatras ang Alsahel Sports Club ng Kuwait para sa 2014 Asian Men’s Club Volleyball Championship (AMCC) na inihahandog ng PLDT Home Fibr.

Sinabi ng koponan na nabigo silang makakuha ng clearance mula sa Kuwait Public Authority for Youth and Sports at ito ay ipinaalam nila sa Asian Volleyball Confederation (AVC) para sa torneong idaraos sa Abril 8-16 sa MOA Arena at sa Cuneta Astrodome sa Pasay City.

Magkasama ang Kuwait at ang Philippine team sa Group A bukod pa sa Iraq at Mongolia.

“It is unfortunate that withdrawals should come at this very late stage when everything is set and ready for the Asian Men’s Club Championship,” sabi ni Ramon ‘Tats’ Suzara, bahagi ng nag-oorganisang Sportscore at isang top official ng AVC.

Ayon kay National head coach Francis Vicente, sinasanay ang Philippine squad ngayon sa Korea, na ang pag-atras ng Kuwait ang magbibigay sa kanila ng tsansang makaabante sa susunod na round.

Ang Pilipinas ay kakatawanin ng PLDT HOME TVolution team, kikilalanin din bilang Power Pinoys na kinabibilangan nina JP Torres, Ron Jay Galang, Jeffrey Malabanan, Alnakran Abdilla at actor-sportsman Richard Gomez at  Australian imports Cedric Legrand at William Robert Lewis.

Maliban sa Kuwait, umatras din ang club team ng India, nasa Group D kasama ang China, United Arab Emirates, Papua New Guinea at Chinese Taipei, sa torneo. Ang Group B ay binubuo ng Iran, Japan, Lebanon at Vietnam at nasa Group C ang 2013 runner-up, Qatar, Kazakhs­tan, Oman, Hong Kong at Turkmenistan.