Maroon miharos sa elims sa SRP Sunday Club tilt

CEBU, Philippines - Bugtong ang Maroon team lang ang nakabuling sa rekord sa  White team pinaagi sa pag-iskor og sikit kaayo nga kadaugan, 81-80 sa pagtapos sa elimination round sa SRP Sunday  Club Christmas League 2013 basketball tournament sa miaging adlaw didto sa San Roque Parish gym sa Brgy. Subangdaku, Mandaue City.

 Pagsugod pa lang, kulbahinam na kaayo ang aksiyon, gani nagbanos-banos pag-ilog sa labaw ang duha ka kampo ug walay bisan usa kanila   nakaseguro pag-angkon og daog ug diha na nahibaw-an paghurot sa gitagal nga oras sa duwa.

 Nagkasabot ang playmaker nga si Richie Tecson ug ang sentrong si Marcial Marturillas diin mipugnit kini og 16 puntos matag usa aron pangulohan ang Maroon nga miharos sa pito nila ka duwa sa eliminasyon.

 Si Benito Aton miabuno'g 15 puntos alang sa Maroon nga makigsangka sa Blue team sa crossover semifinals  karong Domingo.

 Dos puntos lang ang labaw sa Maroon sa first period, 18-16 gikan sa basket ni Marturillas. Mibingat ang ilang labaw ngadto sa otso puntos, 32-24 nga maoy labing daku nilang labaw human sa tira ni Aton sa nahabiling 3:00 sa second quarter.

 Si Robert Sagayno mitusak og three-point shot aron makan-an ang labaw, 27-32 ug napahakan pa kini'g maayo sa   baskets nilang Ohing Ortiz ug Melvin Abatayo, 31-34 hangtod nailog sa White ang momentum, 42-38 pagsugod sa third period.

 Nailog pagbalik sa Maroon ang labaw sa sayong bahin sa final quarter, 60-58 ug sukad niadto wala na nila hatagi'g higayon ang White nga makalabaw pa hangtod nahurot ang oras sa duwa.

 Si Glen 'Dodod' Colina, kinsa miiskor og 10 puntos sa first quarter maoy topscorer sa White team pinaagi sa iyang 21 puntos, lakip na ang iyang usa ka three-pointer nga naghatag sa iyang koponan og 50-48 nga bentaha sa third period. Si Colina mao sab ang nakada'g tabla, 58-all paghuman sa maong kuwarter sa wala pa kontralaha sa Maroon ang nahabiling mga oras sa duwa.

 Ang kanhi UV Lancer cager nga si Rene  Grafe ug Sagayno mikadlit og puntos matag usa, samtang si Ortiz mikulit og 13 puntos alang sa White team.

 Sa sayo pa, ang Blue team  nakadaginot pa gyud og daog sa ilang "non-bearing" game batok sa Black, 93-84.

 Gipangulohan ni  Arnel Colanse ang kadaugan pinaagi sa iyang 19 puntos, gisundan ni Ramon Fontanosa nga mihipos og 15 puntos ug nilang Dante Orendain ug Jojemar Gonzaga nga adunay 10 puntos matag usa.

 Ang Black gipangulohan sab nilang Romeo Castardo ug Robert Lobedica nga parehong miposa'g 24 puntos. Si  Reynald Viacrucis mitimbre'g 16 puntos alang sa Black nga wala gyud makabawon og daog sa pito nila ka duwa sa eliminasyon.

Puntos matag usa

Unang duwa:

 BLUE (93) - Colanse 19, Fontanosa 15, Orendain 10, Gonzaga 10, Povadora 8, Castañeda 6, Paldo 6, Alesna 6, Postell 5, Lipogpog 4, Enriquez 2

 BLACK (84) - Castardo 24, Lobedica 24, Viacrucis 16, Aventajado 9, Peligro 8

Ikaduhang duwa:

 MAROON (81) - Tecson 16, Marturillas 16, Aton 15, Cariño 9, Aposaga 9, Velasquez 8, Castro 6, Alejandro 2

 WHITE (80)  - Colina 21, Grafe 16, Sagayno 16, Ortiz 3, Abatayo 3, Cabcaban 2 (BANAT NEWS)