13th CESAFI kasado na
CEBU, Philippines - Kasado na ang 13th Cebu Schools Athletic Foundation, Inc. (CESAFI) ug gitakda kining sugdan sa Agosto 3 diha sa Cebu Coliseum.
Mao kini ang nasabotan atol sa coaches’ meeting uban ni commissioner Felix O. Tiukinhoy, Jr. kagahapon didto sa UC Customs building.
Pito ka collegiate teams ang mosalmot pinangulohan sa defending champion Southwestern University (SWU) Cobras, samtang siyam sa high school teams nga gipangulohan sa junior champion Sacred Heart School-Ateneo de Cebu (SHS-AdC) Magis Eagles.
Unang magsangka sa opening day ang runner-up University of the Visayas (UV) Green Lancers batok sa University of Cebu (UC) Webmasters sa collegiate division ug UV Baby Lancers batok sa University of San Carlos (USC) Baby Warriors sa high school division.
Gipahibalo ni Tiukinhoy nga walay import nga tugotan nga makaduwa sa high school bisan nabutang kini sa rules and guidelines.
Ang deadline sa pagsumiter sa mga entries gikatakda sa Hulyo 15.
Walay dawaton nga protesta human sa elimination round.
Ang collegiate teams mopailawom sa single round robin series ug ang top team moabante sa semis, samtang ang unom ka teams maoy magtinaktakay pinaagi sa playoffs diin ang no. 2 makigsangka sa no. 7 ang no. 3 batok no. 6 ug
ang no. 4 batok no. 5. Ang nos. 2, 3 ug 4 makabaton og twice-to-beat batok sa nos. 5, 6 ug 7.
Mao sab ang paagi sa secondary.
Ang championship sa collegiate division ipaagi og best of five series, samtang best-of-three sa high school.
- Latest
