Ornopias misidlak sa FIM race Keiz BJ modalit Easter Sunday moto-x

CEBU, Philippines -  Pipila ka dekalibreng riders dinhi sa Sugbu ang mopakita na  usab sa ilang katakus sa Keiz BJ and Phoenix

Cyclomax Titan motocross race karong Marso 31 (Easter Sunday) didto sa lungsod sa Tuburan, Cebu.

  Pagauloha'g Brgy. Capt. Wilfredo Diamante Birthday Celebration Invitational Motocross, ang usa ka adlaw

nga lumba gilaumang mohatag sa mga dumuduong og laing kulbahinam nga pasundayag.

 "Lain na sab kini nga lumba  sa  motor nga dili angay palabyon sa mga fans. Ubang top riders dinhi sa Sugbu

moapil, so nindot ug makalingaw gyud ang lumba," matud pa ni Keiz BJ  Motors big boss Siegfred Ornopia, kinsa usa sab

ka rider ug nakahakot na og daghang championship trophy sa maong matang sa sports.

 Ning bag-o, si Ornopia milampos sa iyang pagpanikaysikay sa Philippine leg sa FIM Asian Motocross

Championships niadtong Marso 23-24 didto sa Puerto Princesa, Palawan.

 Si Ornopia mikampiyon sa executive division ug ikaduha sa Asian veteran category.

 Tulo ka masaarong anak ni Siegfred mikawat sab og salida sa maong kompetisyon.

 Ang iyang kinamanghurang anak nga si Keizer Ornopia mikampiyon sa juniors 65cc category. Ikaduha usab

siya sa juniors 50cc division, samtang  si Ken Kerry  ikaupat sa juniors 65cc category ug ang iyang kinamaguwang nga si

Brylle ikaupat sa Asian juniors 85cc class.

 Sa Asian MX2 division, lima  ka Pinoy ang nakalusot sa top 10 sa maong lumba nga gisalmotan sa riders gikan

sa nagkalain-laing bahin sa Asya. Si Kenneth San Andres mipahiluna sa ikaupat, si Jovie Saulog sa ikalima, ang

Sugbuanong si Jonjon Adlawan miokupar sa ikaunom nga dapit, samtang ang managsuong Abellar nga si Juvenille ug

Jovanie miangkon sa ikapito ug ikasiyam nga dapit.

 Ang umaabot nga lumba ni Ornopia gipaluyohan  ni Tuburan Mayor Democrito 'Aljun' Diamante, Brgy. Capt.

Wilfredo Diamante, Geoffrey Viñalon sa Phoenix Petroleums, Edmund Pingkian sa Haojue Phils., Romy Ouano ug sa

RMO Motorparts. (BANAT NEWS)