Reyes, 3 pa umusad; Bustamante laglag na
MANILA, Philippines - Nagpatuloy ang kinang ng dating kampeon na si Efren “Bata” Reyes, Dennis Orcollo,Ronato Alcano at Jose Parica nang manalo pa sa winner’s group sa idinadaos na 37th Annual US Open 9-Ball Championship sa Holiday Inn sa Virginia Beach, USA.
Si Reyes na kampeon noong 1999, ay nanaig kay Thorsten Hohmann ng Germany, 11-9, para makatapat ang two-time defending champion na si Darren Appleton ng Great Britain sa fourth round.
Si Orcollo ay nanalo kay Mark Gray ng Great Britain, 11-7; si Alcano ay kuminang kay David Alcaide ng Spain, 11-10, at si Parica ay nangibabaw kay Donny Mills ng USA, 11-9.
Natalo naman si Santos Sambajon kay Fil-Canadian Alex Pagulayan, 9-11, upang malaglag na sa loser’s bracket.
Samantala, unang nasibak sa hanay ng mga Pinoy ay si Francisco Bustamante ng lumasap ng dalawang kabiguan.
Nalaglag si Bustamante sa loser’s side kay Mika Immonen ng Finland, 8-11, bago namaalam kay Warren Kiamco sa dikitang 10-11 iskor.
Palaban pa rin si Carlo Biado nang manalo kay Brett Stottlemyer, 11-7, sa loser’s side. Bumaba si Biado sa loser’s side ng matalo kay Tom D’Alfonso ng Italy, 7-11.
- Latest
