Oslob, Toledo, Asturias daog cluster titles sa GUV Cup

CEBU, Philippines - Naghari ang Oslob ug  Toledo sa managlahi nilang cluster sa women's division sa 2012 Governor Gwen Garcia Unity Volleyball (GUV) Cup sa managlahing binyu.

Ang Oslob midominar sa cluster 2, samtang ang Toledo sa cluster 4.

Giharos sa Oslob ang tanan nilang duwa didto sa Boljoon Sports Complex.

Ang Oslob gilisud-lisud una sa Ginatilan una nila maangkon ang  25-21, 25-27, 25-14 nga kadaugan sa wala pa nila   pulbosa ang Boljoon sud sa straight sets, 25-22, 25-20.

Ang Ginatilan maoy first runner-up human nila gipilde ang Boljoon, 13-25, 25-11, 25-19.

Sa laing bahin, ang Asturias mipahimulos sa ilang homecourt advantage aron mosakmit og duha ka korona.

Ang Asturias milangkat sa kiddies titles  batok sa Tabuelan, 25-8, 25-4 ug men's title human gipilde ang  Toledo City, 25-13, 25-5.

Hinuon, ang Toledo may ikapasigarbo usab dihang ilang gisakmit ang women's division title human gimasaker ang Asturias, 25-13, 25-5 ug Tabuelan, 25-18, 25-20.

Mipahiluna sa ikaduha ang Tabuelan human gipilde ang Asturias, 25-14, 25-17.

Ang cluster 3 action sa GUV Cup himuon karong weekend didto sa Moalboal.

Pangulohan sa host, ang lain pang mopakita'g aksiyon mao ang Alegria, Dumanjug, Ronda ug Badian. (BANAT NEWS)