Singwangcha mi-TKO ni Mabait

CEBU, Philippines - Nagpungasi nga mga suntok ang gibuhian ni undefeated Marco Demecillo Singwangcha aron paundangon sa ikatulong hugna si Marvin Mabait ug aron sab maangkon ang Philippine flyweight title sa main event sa "Kadaugan sa Mactan" boxing card sa miaging gabii didto sa   Mactan Shrine sa Lapu-Lapu City.

Kulbahinam ang maong sangka nga usa karon ka nominado isip Philippine "Fight of the Year," dihang natumba sa unang higayon si Singwangcha sa first round human maigo sa left hook ni Mabait.

Apan kalit lang mibawos si Singwangcha sa misunod nga round ug mao na usab ang mimakmak ni Mabait, kinsa nagkapuliki og panagang   sa nagbagang kumo ni Singwangcha.

Naluya si Mabait sa kastigo nga iyang nadawat ug pagtungtong sa third round gibanatan na usab kini ni Singwangcha ug nalup-og.

Mibarog si Mabait human iphi sa referee, apan wala na mag-usik pa og panahon si Singwangcha ug iya na usab kining gidabodabohan nga nakapaaghat sa trainer niining si Carl Peñalosa pagpahunong sa away sa oras nga 1:12 sa maong round.

Sa maong kadaugan, si Singwangcha mipalambo sa iyang rekord ngadto sa 16-0, 12KOs, samtang si Mabait nakatilaw sa iyang labing unang pilde sud sa 19 ka away. (BANAT SPORTS)