Nagpatung-patong nga isyu
Samtang nagkaduol na ang away ni Manny 'Pacman' Pacquiao sa Hunyo 9, nagkadaghan usab ang mga kontrobersiya ug isyu nga daw ikog nga nagsunod-sunod sa atong kampiyon.
Dugang pa niini, ang bag-ohay lang nga deklarasyon sa Ring Magazine nga dili na si Pacquiao ang "pound-for-pound" king kay si Floyd Mayweather Jr. na pud daw.
Mga tirador bisan tuod og garbo gyud kaayo nato kun usa ka Pinoy ang "P4P" king pero kun ang hinungdan lang pud nga pagkatangtang ni Pacquiao sa maong puwesto may bulok impluwensiya sa ubang gamhanang tawo dili kini nato angayang ikasakit.
Kun buot huna-hunaon mas daghan pa og away si Pacquiao nga gihimo kumparar kang Mayweather sulod sa nilabay’ng tulo ka tuig. Pulos sab kini midaog. Si Mayweather kanus-a ra man siya uwahing misaka sa ring ug midaog? Kadtong nagkontra sila ni Victor Ortiz? Kadtong iyang gi-KO si Ortiz nga wala makabantay?
Daghang mga boxing experts ug analysts ang misaway sa maong pagkatangtang ni Pacquiao isip "P4P" kay bisan makausa wala pa kini siya mapilde ning mga panahona kay matud pa nila dili daw makatarunganon, angayang tangtangon ang usa ka boksidor sa maong trono kun napildi kini.
Nagpatong-patong karon ang huna-hunaon sa atong Pambansang Kamao sama sa isyung "tax evasion" nga kusganon hinuon kining gihimakak ni Pacquiao. Dugangan pa ang iyang trabaho isip magbabalaod sa Kongreso.
Nadugangan kini ning bag-ohay lang kay gikiha ang iyang Manny Pacquiao Foundation ug ang pagduda sa mga tawo kun duna pa ba gihapon kini "killer instinct" human kini nangangkong ‘nakaestorya’ niya ang Ginoo sa iyang damgo.
Sa wala pa siya padamgoha, nakita nang daan ang kawala niya'y "killer instincts" sa uwahi niyang mga sangka. Ang pangutana, naa pa bay ‘killer instinct’ si Pacquiao? Aw, anhi nato ni makita sa away nilang Timothy Bradley.
* * *
PAGTULON-AN: Ang matag kapakyasan nagpasabot kini nga nagkaduol na ang kalampusan.
- Latest
- Trending
