White nag-solo sa liderato sa Maj. Abbariao Cup

CEBU, Philippines - Gipukan sa White team ang higpit nilang karibal nga Green, 83-73 aron magsolo sa liderato sa 3rd Maj. Alfonso Abbariao Cup-Biggest Loser 2012 Inter-Color basketball tournament didto sa Basak-San Nicolas gym.

Si Boodie Monteño miposa og 16 puntos, samtang sila si Andrew Yu, Jeneson Sabanal ug Kenneth Maningo nagkumboya og 36 puntos alang sa White nga naghari sa liderato bitbit ang 5-1 nga baraha.

Ang top gunner nga si Jingjing Rama mipabuto og 27 puntos, apan dili gihapon paigo aron baswaton niya ang team ngadto sa kadaugan, samtang si Noel Medalle mitira og 22 puntos alang sa Green nga adunay 4-2 nga baraha.

Human magtabla, 22-all sa first period, ang White hinay-hinay nga mipaburot sa labaw ug kalit nga misutoy sa third period aron kontrolahon ang duwa. Si Monteño mitusak og 12 ka sunod-sunod nga puntos sa second quarter aron hatagan ang White og sayes puntos nga labaw sa halftime, 45-39.

Ang White mirehistro sa ilang labing dakung labaw nga 17 puntos, 68-51 ug wala na nila hatagi og laing higayon nga makasikit ang Green.

Sa laing duwa, ang Blue mibuntog sa Red, 64-51 aron putlon ang lima ka sunod-sunod nga pilde.

Si District Collector Ronnie Silvestre miiskor og 16 puntos alang sa labing unang daog sa Blue. Apan si Raymund Delig maoy nangu sa Blue sa iyang 22 puntos, gisundan ni Mark Gornez nga adunay 18 puntos.

PUNTOS MATAG USA

Unang duwa:

WHITE (83) - Monteño 16, Yu 14, Sabanal 12, Maningo 10, Rabago 8, Dela Cruz 5, Viodor 5, Paghasian 5, Nadal 4, Cañete 4

GREEN (73) - Rama 27, Medalle 22, Herbito 8, Javellana 8, Trinidad 4, Banuag 2, Datu 2

Ikaduhang duwa:

BLUE (64) - Delig 22, Gornez 18, Silvestre 16, Canonayan 4, Librando 2, Vandame 2

RED (51) - Dejaresco 14, Mabalo 12, Apuya 7, Quiño 6, Velarde 5, Ali 5, Bailio 2 (BANAT SPORTS)