Saksak sinagol gibati ni Casimero

CEBU, Philippines - Kalipay sagol kaguol ang gibati sa bag-ong IBF light flyweight champion nga si Johnriel 'Quadro Alas' Casimero sa iyang pag-abot dinhi sa Sugbu kagahapon gikan sa iyang   malampusong kampanya didto sa Buenos Aires, Argentina.

Si Casimero milangkat sa bakanteng bakus human niya gipaundang sa round 10 ang beteranong Argentinian fighter nga si Luis Alberto Lazarte niadtong Sabado (oras dinhi sa Pilipinas)

Ang 22-anyos nga si Casimero nagmaya human niya makab-ot ang iyang damgo nga mahimong world champion ug ingon paghatag og dungog sa    nasud. Apan taliwala sa iyang kalampusan, wala niya kapugngi ang pagpatulo sa iyang luha tungod sa kamatayon sa iyang manghod, kinsa namatay sa sakit sa kasingkasing didto sa Ormoc City.

Ang manghod ni Casimero nga si Jerald ug kanhi   amateur boxer mitaliwan niadtong Enero 31, apan bisan pa niini wala kini mahimong babag sa dalan ni Johnriel.

"Nalipay ko pero di malikayan nga maguol gamay kay namatay man ako manghud," matud pa ni Casimero, kinsa miabot kagahapon didto sa Mactan Cebu International Airport uban ang iyang trainer nga si Pingping Tepora Jr. ug Cebuano promoter   Sammy Gello-ani.

Gidetalye usab ni Casimero ang makalisang nilang kasinatian atol sa "riot" diin giatake sila sa mga fans ni Lazarte human gyud siya gideklara isip mananaog

"Wala na kaayo ko nakahuna-huna og tarung atong hitabo kay ako molikay nalang nila (Argentinians)," matud pa niya.

Sa iyang bahin, si Gello-ani namahayag nga grabe ang ilang gidangatan didto sa Argentina, apan nadawat na niya kini tungod kay dili malikayan ang mga panghitabo sama sa "riot" ilabi na sa natad sa boksing.

"Nakuha namo ang titulo in a hard way," matud pa niya. "Sa wala pa ang duwa kabaw mi nga we are in a bad situation pero ang sa akoa normal rana ang importante is we got the belt."

Midugang pa si Gello-ani nga aduna na siya'y mga tanyag nga paawayon si Casimero sa Japan o sa Las Vegas, apan wala una niya kini hatagi og atensyon aron hatagan pa og panahon ang iyang batos nga makapahuway ug makabakasyon uban sa iyang pamilya didto sa Ormoc City. (BANAT NEWS)