BIR gilumsan sa MCWD aron moabante sa finals

CEBU, Philippines - Gilumsan sa Metro Cebu Water District (MCWD) ang undermanned Bureau of Internal Revenue (BIR)-Cebu ni regional director Rodita Galanto, 87-61 niadtong Miyerkules aron mo-abante sa finals sa Group B division sa nagpadayong 2011 Association of Regional Executives in National Agencies (ARENA-7) basketball tournament didto sa Capitol Parish gym sa dalan Escario, ning siyudad.

Ang MCWD sayo kaayong milubong sa BIR, 20-6 sa first period pinaagi sa tandem nilang Lucero Gako ug Ben Basergo.

Mihulga unta pag-rally ang BIR sa second period diin ilang na-outscore ang MCWD, 24-15 ug padayon nilang gisusteneran ang ilang rally aron mosikit ngadto na lang sa singko puntos sa halftime, 30-35 kortesiya nilang Yoly Meso ug Leo Galvez.

Apan kalit lang sab dayon nagmangtas ang MCWD pagsugod sa third quarter dihang mipabuhagay kini og mga puntos, 22-15 pinaagi nilang Melvin Paz ug Bert Handaya aron moposte’g 12 puntos nga bentaha, 57-45 pagsugod sa fourth period.

Si Gako maoy nangu sa MCWD sa iyang 16 puntos, samtang si Paz midugang og 11 puntos. Nakakuha sab og double figures si Basergo pinaagi sa iyang 10 puntos.

Ang BIR gipangulohan ni Meso, kinsa mihakot og 13 puntos ug si Galvez miabuno og 11 puntos.

PUNTOS MATAG USA

MCWD (87) - Gako 17, Paz 11, Basergo 10, Handaya 10, Abatayo 8, Mission 7, Chan 6, Feroleno 6, Nicanor 6, Jumao-as 2, Umacob 2, Ebrado 2

BIR (61) - Meso 13, Galvez 11, Bonsucan 8, Sorela 6, Dizon 5, Victor 5, Del Rosario 3, Llavore 2, Diamos 2, Detorio 2, Alburo 2, California 2. (BANAT NEWS)