Bostolits, SBC mikulit sa ikaduha nilang daog
CEBU, Philippines - Parehong mikulit sa ilang ikaduhang kadaugan ang Grace Bostolits ug SBC Brewers aron magsawo sa liderato sa elimination round sa Ayala Inter-Merchant 2011 basketball tournament didto sa Benjamin Solon Memorial Gym sa barangay Cogon-Ramos, ning siyudad.
Ang Grace Bostolits misandig sa ilang skipper ug three-point artist Toly Petiluna aron mo-iskor og 75-68 nga kadaugan batok sa mas tag-as nga Max’s Restaurant, samtang ang SBC Brewers midaog batok sa Rustans, 58-51.
Nagsawo karon ang Bostolits ug SBC Brewers sa liderato sa managsama nilang 2-0 win-loss records.
Silang Petiluna ug Jeck Meting maoy nangu sa Bostolits sa ilang 17 ug 16 puntos matag usa, sila si Barluado ug Angel Mancao mirehistro sab og double figures.
Si Richard Ygot mao sab ang nangu sa napildeng Max’s Restaurant (1-1) sa iyang game-high 25 puntos.
Sa laing duwa, sikit sab ang resulta tali sa SBC Brewers ug Rustans diin kanunay kining nagtabla sa unang duha ka kuwarter sa wala pa mohimo og 23-9 nga rally ang naulahi sa fourth period aron pagselyado sa kadaugan.
Si Cabucos maoy nangu sa Brewers nga miposa'g 17 puntos samtang sila si Gonzales ug Barawedan nagkumboya og 23 puntos.
Sa habig sa Rustans, sila si Berdin ug Villahermosa nagkumboya og 29 puntos aron pangulohan ang ilang kapildihan. Milingkod isip commissioner sa maong liga mao si Peter Lalican. (BANATSPORTS)
- Latest
- Trending
