Kinamangay na sa Waterfront Hotel

CEBU, Philippines -  Wala nay atrasay alang sa tulo ka ALA fighters, kinsa moatubang na sa tagsa-tagsa ka hagit sa ilang mga karera batok sa mga banggiitang Mehikano sa "Pinoy Pride 8: Philippines vs. Mexico" karong gabii diha sa Waterfront Cebu City Hotel and Casino.

Ang world flyweight title contender nga si Milan 'El Metodico' Melindo mopamatuod sa iyang lugar isip world title challenger, samtang si Jason 'El Niño' Pagara ug Genesis 'Azukal' Servania mopakita nga anaa kanila ang abilidad nga mopukan og mga top caliber boxers.

 Naukay ang mga boxing fans atol sa official weigh-in kagahapon didto sa entertainment center sa SM City-Cebu dihang milapas og lima ka libras sa weight limit nga 112 lbs. ang three-time world title challenger nga si Francisco 'Chiquita' Rosas

Tungod niini, mimando ang ALA Promotions nga laslasan ni Rosas ang iyang timbang, apan pakyas gihapon kini dihang mitimbang kini og 113.5 lbs.

Tungod niini, laslasan sa ALA Promotions ang premyo nga madawat sa Mehikano ug dili usab niini makuha ang WBO Intercontinental flyweight kun ugaling modaog siya batok ni Melindo.

Sa iyang bahin, si Melindo kinsa milampos pagkuha sa timbang, nagkanayon nga taktika sa Mehikano nga dili mutuman sa timbang aron makapabor kini atol sa ilang away.

Apan bisan pa niini, ang 23-anyos nga boksidor masaligon nga molampos gihapon siya pagbuntog sa Mehikano.

"Kahibaw ko style gyud ni niya nga magpabug-at pero di ko affected, sakto ko sa preparation ug pabilin akong salig sa akong kaugalingon," matud pa ni Melindo. "Pangitaon gyud nako ang knockout, tan-awa lang ninyo."

Sa supporting bout, mipakita sa iyang kompiyansa ang ALA light welterweight nga si Pagara sa iyang away batok ni knockout specialist   Rosbel 'Lobito' Montoya.

"Ako usbon, wa gyud ko nahadlok sa iyang record, andam ko ani ug usa ra gyud ang naa sa ako huna-huna, ang pagdaog," matud pa niya.

Sa iyang bahin, ang 20-anyos nga si Servania mopakita nga angayan siya sa kahigayonan nga gihatag sa ALA Promotions sa pag-away sa dakung entablado.

Si Servania makigsangka sa beteranong si Gerson 'El Nene' Guerrero. (BANAT NEWS)