Duna gyu'y mahayang

CEBU, Philippines -  Aduna gyu'y mahayang ibabaw sa ring dihang pulos nagbinaharay ang mga Pinoy ug Mehikanong boksidor nga modaog pinaagi sa knockout atol unya sa "Pinoy Pride 8: Philippines vs. Mexico" ugma sa gabii diha sa Waterfront Cebu City Hotel and Casino.

Sila si Milan 'El Metodico' Melindo, Jason 'El Niño' Pagara ug Genesis 'Azukal' Servania sa ALA Boxing nagkita uban sa tagsa-tagsa nila ka mga Mehikanong kaatbang sa labing unang higayon atol sa final press conference kagahapon didto sa Aegean Room sa Waterfront.

Human makadungog sa pamahayag ni former three-time world challenger Francisco 'Chiquita' Rosas, kinsa wala miisip kaniya nga kuyaw nga boksidor bisan pa sa iyang limpyo nga record, si Melindo daling mibawos pinaagi sa pagbahad nga tumbahon ang Mehikano atol sa ilang away.

Ang 24-anyos nga si Melindo (24-0, 8KOs) makigsangka ni Rosas (22-8, 13KOs) alang sa bakanteng WBO Intercontinental flyweight title.

"Sakto siya (Rosas) dili basihan ang rekord ingnon nga maayo ka nga boksidor, pero kun moingon siya nga pasakitan ko niya sa away, aw tan-awon nato basin siya'y masakitan," matud pa sa taga-Cagayan De Oro nga si Melindo.

Sa iyang bahin, si Pagara miklaro nga wala siya malisang sa ngilngig nga rekord sa iyang kontra.

Si Pagara (27-1, 16KOs) manalipod sa iyang WBO Youth AsPac light welterweight title batok ni Rosbel 'Lobito' Montoya (34-4, 29KOs). 

"Wa gyud ko nahadlok sa iyang rekord, anytime kaya nako siya tumbahon," matud pa ni Pagara. Apan si Montoya mibawos ug misaad nga iyang tumbahon si Pagara.

Wala usab magpa-alkanse ang rising prospect sa ALA nga si Servania (14-0, 5KOs) nga mipakita usab og kompiyansa bisan pa og sangkaon niya ang beteranong si Gerson 'El Nene' Guerrero (37-8, 29KOs).

Bisan pa og kuwang siya sa kasinatian, nagtuo si Servania nga iyang matumba si Guerrero, kinsa nakasangka na og mga sikat nga boksidor sama ni Daniel Ponce de Leon.

Karong alas-11 sa buntag, himuon ang official weigh-in sa "Pinoy Pride 8" diha sa Entertainment Center sa SM City-Cebu. (BANAT NEWS)