Kings itatagay ang 2 dikit na panalo vs Llamados
Manila, Philippines - Sa kanyang ikatlong laro, inaasahan ni coach Jong Uichico na nakapag-adjust na si import Donald Sloan sa kanyang mga kakampi.
Umiskor si Sloan, pumalit sa may injury na si Curtis Stinson, ng 32 points sa 98-90 paggupo ng Barangay Ginebra sa Rain or Shine noong nakaraang Miyerkules patungo sa semifinal round ng 2011 PBA Governors Cup.
“We have more time to work on things and Sloan has more time to get accustomed to his teammates,” sabi ni Uichico.
Hangad ang kanilang ikalawang sunod na panalo, sasagupain ng Gin Kings ang B-Meg Llamados ngayong alas-7:45 ng gabi matapos ang salpukan ng Alaska Aces at Petron Blaze Boosters sa alas-5:30 ng hapon sa Araneta Coliseum.
Tangan ng Talk 'N Text ang 7-2 baraha kasunod ang Petron Blaze (5-3), Ginebra (5-3), Alaska (5-4), B-Meg (5-4) at Rain or Shine (4-5).
Ang top two teams ang siyang maglalaban sa best-of-seven championship series, habang ang koponang mananalo sa apat sa limang laro ang makakakuha ng playoff para sa ikalawang finals berth.
Nanggaling rin sa panalo ang Llamados matapos biguin ang Elasto Painters, 99-98, noong Biyernes.
“They play a lot like Rain or Shine,” pagkukumpara ni B-Meg mentor Jorge Gallent sa Ginebra na tumalo sa B-Meg, 89-85, noong Hulyo 10 sa elimination round. "They push the ball hard as they love to run.”
Sa unang laro, pilit namang duduplikahin ng Boosters ang kanilang 82-81 overtime win sa Aces sa kanilang unang pagtatagpo noong Hulyo 3.
Hindi pa rin makakalaro si Cyrus Baguio para sa Alaska bunga ng kanyang MCL injury sa kaliwang tuhod na kanyang nakuha sa kanilang ensayo noong nakaraang Huwebes nang aksidenteng mabagsakan ni Mark Borboran.
Samantala, minultahan ng PBA Commissioner's Office si Aces' coach Tim Cone ng P20,000 dahil sa pagkompronta sa mga referees matapos ang kanilang 85-103 kabiguan sa Tropang Texters noong Biyernes.
- Latest
- Trending
