SWU kampiyon unang Alberto's Pizza caging

CEBU, Philippines - Ang free throw ni Nic Cornelio maoy niluwas sa Southwestern University (SWU) sa ilang kulbahinam nga duwa batok sa Cebu Doctors' University (CDU) Spartans, 72-71 ug aron usab malangkat ang kampiyonato sa 1st Alberto’s Pizza Cup-Nursing Edition basketball tournament didto sa University of Southern Philippines Foundation (USPF) gym.

Gikontrolar sa SWU ang first-half, apan nigukod ang CDU sa pagpangulo nila ni Ram Enriquez ug Alnico Surpia aron ilogon ang siyete puntos nga labaw sa nahabiling 1:30 sa duwa.

Mibugwak sab og mga puntos ang SWU sa paningkamot sa ilang team captain nga si Keith Mendez ug Cornelio aron tablahon ang duwa, 71-all.

May kahigayonan unta ang Spartans nga maangkon ang daog, apan nikagar ang ila untang game-winning shot.

Si Mendez maoy topscorer sa SWU sa iyang 24 puntos, samtang si Cornelio adunay 19 puntos. Nangulo sa pilderong Spartans mao si Enriquez, kinsa miposa og 19 puntos ug si Surpia miamot og 17 puntos.

Sa sayo pa, ang University of San Carlos (USC) Team A midemolis usab sa CDU Nursery, 64-45, alang sa ikatulong dapit. (BANATSPORTS)