Jaca mipaundang ni Dunal

CEBU, Philippines - Gipakita ni Jimrex ‘The Executioner’ Jaca nga andam na siya alang sa laing world title fight lakip na ang damgo niyang rematch batok ni Mexican lightweight king Juan Manuel Marquez.

Kini human niya sayung gipaundang si Arnel Dunal pinaagi sa body shot alang sa technical knockout nga kadaugan sa main event sa “Nights of Gladiators” niadtong miaging gabii didto sa Tabunok Sports Complex, syudad sa Talisay.

Nagsinukdanay pa sa kusug ang duha, dihang kalit lang mibuhi og kombinasyon si Jaca nga gitapos sa usa ka left uppercut sa kuto-kuto nga maoy mipakub ni Dunal ibabaw sa ring sa 2:35 sa third round.

“Plano gyud nako to nga lawason siya (Dunal) kay nakita nako nga sakitan man siya kung maigo nako sa lawas,” matud pa ni Jaca kinsa gitakdang moharung sa sunod sa Russian champion nga si Beka Sahatdia sa Mayo 14 didto sa Waterfront-Cebu City Hotel and Casino.

Sa supporting bout sa R.S Promotion boxing event, ang Espanyol nga si Felix Soria mi-TKO usab sa taga-Butuan nga si Giovannie Rota sa 2:03 sa opening round.

Sa laing bahin, wa usab magpauwahi ang world title prospect nga si Dodie Boy Peñalosa Jr. kinsa miiskor usab og first round knockout batok ni Jun Morano sa oras nga 1:18.

Mokumpleto sa resulta sa undercard mao sila si Julios Alcos kinsa midaog via unanimous decision batok ni Tanta Ricablanca ug Sarry Canonigo kinsa midesisyon usab ni Roel Honor.

Ang garbo sa Dalaguete, Cebu nga si Virgilio Silvano midemolis sa third round ni Erwin Pulvera, samtang miresulta sa majority draw ang sangka nila ni Jelbert Bacalso ug Junny Salogaol.  - BANAT NEWS