Igimax salmut sa Tour of Jala-jala

CEBU, Philippines - Ang Cebuano teen cycling sensation nga si Luis Miguel 'Igimax' Maximo mosalmot sa labing una niyang out-of-town competition karong tuiga sa Tour of Jala-jala karong adlawa didto sa Mabitac, Rizal.

Mosuway na usab si Maximo pagsakmit sa titulo sa junior division batok sa gatosan pa ka mga elite cyclists sa nasud.

Gawas sa junior division, ang usa ka adlaw nga kompetisyon nga gipasiugdahan sa Pilipinas Cycling League (PCL) naglakip usab sa men ug women’s open.

Ang third year high school student sa PAREF-Springdale makiglumba batok sa mas edaran pa nga mga cyclists diin ilang taakon ang tungason nga rota paingon sa finish line.

Hinuon si Maximo, kompiyansa nga makapakita og nindot nga performance human usab sa iyang pagsalmot sa Tour ni Frank sa sayo ning buwana didto sa Toledo City. 

Gisuportahan sa OZ Racing, PAREF Springdale ug Maximax, si Maximo mogamit sa modernong Token carbon bike gikan sa YKK Trading. Ang maong bisiklita gihulagway ni Maximo nga mas paspas ug gaan itandi sa iyang gigamit kaniadto. (BANATSPORTS)