Lite Shipping miangkon sa Game-1 sa Lucio Lim Sr. cagefest

CEBU, Philippines - Nagmangtas ang topseed nga Lite Shipping sa third period aron ilubong ang no. 2 team Cebu Movers System, 106-75 sa Game-1 sa ilang best-of-three title showdown sa Lucio 'Guy' Lim, Sr. Memorial Cup basketball tournament niadtong Domingo didto sa City Sports Club-Cebu gym sa Cebu Business Park.

Gikan sa 50-42 nga labaw   sa sayong bahin sa second period, ang Lite Shipping hinay-hinay nga miinat sa ilang labaw ug nagkadaku kini sa matag kuwarter hinungdan nga wala makalahutay ang Cebu Movers System. 

Nakahimo sa paghulga ang Cebu Movers sa iskor nga 54-63, apan wala sila makapugong sa paglawig sa Lite Shipping ilabi na sa third period diin milabaw na sila’g 32 puntos.

Ang abtik nga point guard nga si Eming Batarilan mihimo’g daghang interceptions didto sa third period aron pagpasiugda sa mainitong rally ug maoy nangu sa opensa sa Lite Shipping sa iyang 28 puntos, gisundan ni Taipan Cabral nga adunay 27 puntos. Ang ex-UV Lancer nga si Dante Elim midugang og 19 puntos ug ang team owner nga si Niño Imboy miabuno og 13 puntos.

 Ang gikastigong Cebu Movers gipangulohan sa ilang beteranong player nga si Joselito Ocampo, kinsa mipabuto og 22 puntos, samtang si Franco Te, ang anak ni playing coach Dr. Boy Te, miamot og 21 puntos. Bisan og wala kaayo mangigo si Inting Reyes sa gawas, nakakuha gihapon siya’g 15 puntos alang sa Cebu Movers. Sa sayo pa, ang Aisle Marine Services mibuntog sa mas solido nga FAL Shipping pinaagi sa pagkulit og 80-56 nga demolisyon.

Susama sa Lite Shipping, ang Aisle Marine Services nagkinahanglan lang modaog ugma aron maangkon ang ikatulong puwesto.

Sa laing bahin, ang organizers sa Guy Lim Cup nangandam na alang sa labing unang All-Star Game nga ipahigayon sa dili pa ang Pasko. 

Puntos Matag Usa

Unang duwa: (for third)

Aisle Marine (80) - Baguio 28, W. Ogue 18, Satina 10, Manigque 9, Gimena 8, Sencil 2, Ogue 2

FAL Shipping (56) - Molina 23, J. Tumulak 10, Borja 7, Madrelino 7, Revilles 5, Tubli 2, N. Tumulak 2

Ikaduhang duwa: (championship)

Lite Shipping (106) - Batarilan 28, Cabral 27, Elim 19, N. Imboy 13, Banados 8, Cabanas 6, J. Imboy 3, Sinoy 2

Cebu Movers (75) - Ocampo 22, F. Te 21, Reyes 15, Sasing 6, B. Te 6, Amoroto 3, Bulilan 2. – BANAT NEWS