Si Simon naman ang bida sa 2 sunod na ratsada ng Llamados
MANILA, Philippines - Sa ikalawang sunod na pagkakataon, muling pinakinang ni PJ Simon ang kanyang bituin.
Tumipa ng career-high 42 points, tinulungan ni Simon ang nagdedepensang Derby Ace sa 102-97 panalo kontra Air21 para sa kanilang ikalawang sunod na ratsada sa elimination round ng 2010-2011 PBA Philippine Cup kagabi sa Araneta Coliseum.
Nagtala rin ang pambato ng Makilala, North Cotabato ng perpektong 11-for-11 shooting sa two-point range at 14-of-18 clip sa freethrow line para sa Llamados ni rookie coach Jorge Gallent.
“Ganoon talaga minsan. Sinusuwerte lang,” sambit ng 30-anyos na 2008 PBA All-Star Most Valuable Player. “Nagpapasalamat rin ako kay coach (Gallent) sa pagbibigay niya sa akin ng playing time.”
May 3-5 baraha ngayon ang Derby Ace kagaya ng Meralco at Air21 sa ilalim ng San Miguel (6-2), Talk ‘N Text (6-2), Ginebra (5-2), Rain or Shine (4-4) at Powerade (3-4) kasunod ang Barako Bull (2-5).
Bumangon ang Llamados mula sa isang 11-point deficit sa first period para agawin ang unahan sa halftime, 48-46, kontra Express tampok ang 19 points ni Simon.
Muling napasakamay ng Air21, nasa isang two-game losing skid ngayon, ang lamang sa 55-52 sa unahan ng third quarter bago ihulog ng Derby Ace ang isang 13-0 bomba para ilista ang isang 10-point lead, 65-55, sa 7:06 nito.
Humugot naman si No. 2 overall pick Rabeh Al-Hussaini ng 16 sa kanyang career-high 25 points sa final canto upang idikit ang Express sa 94-99 sa huling 42.4 segundo.
Derby Ace 102 - Simon 42, Yap J. 16, Maierhofer 9, Yap R. 9, Salvador 8, Gaco 7, Villanueva 7, Adducul 4, Allado 0.
Air 21 97 - Al-Husseini 25, Buenafe 14, Gonzales 12, Arboleda 12, Baclao 11, Urbiztondo 10, Matias 6, Quinahan 4, Rodriguez 3, Guevarra 0, Sharma 0.
Quarterscores: 16-27, 48-46, 75-70, 102-97.
- Latest
- Trending
