East midaog sab

CEBU, Philippines - Sulagma kaayo ang East All-Stars sa collegiate ug secondary divisions parehong midaog og tres puntos batok sa West All-Stars   atol sa tinuig nga CESAFI All-Star Games niadtong Domingo diha sa Cebu Coliseum.

 Ang East naka-ipsot batok sa West sa iskor nga 70-67 ubos sa collegiate division sa usa sab ka come-from-behind nga kadaugan, samtang ang East mikulit sab og 82-79 nga kadaugan batok sa West sa secondary division.

Hinuon, nakakuha sab og dungog ang West dihang si Kelvin Juliane sa UC Webmasters maoy nakampiyon   sa 3-Point Shootout si Arrd Evan Diango sa SWU Cobras maoy midaog sa H-O-R-S-E trick game human iyang gipilde si Eman Calo sa UV Green Lancers sa finals.

Ang East nabiyaan pa unta og 11 puntos, 49-60, nga may kapin pa sa siyete minutos ang oras, apan hinay-hinay kini nilang gipapas ubos sa pagtimon sa lima sa pito ka pambato sa Lancers nga mibawos og 14-0 run aron masakmit ang labaw, 63-60 human sa basket ni Kurt Amores sa USJ-R Jaguars sa nahabiling 4:47 sa duwa.

Si Ralf Olivares sa UV maoy nakapabalik sa labaw sa East,   61-60 sa wala pa kini inata ni Amores ngadto sa 63-60. Padayong sikit ang duwa ug walay usa kanila nga milabaw og kapin sa tres puntos.

Nabiyaan og tres puntos, sa daginutong segundos sa iskor nga 67-70, ang West misuway unta sa pagtabla sa duwa, apan si Michael Cantonao sa USC Warriors misipyat sa iyang three-point nga posible untang mohatod sa duwa ngadto sa stalemate.

Si Phil Mercader, usa sa pito nga pambato sa Lancers maoy nangu sa East sa iyang 14 puntos, samtang ang duha niya ka teammates nga sila si Adrian Lao ug Jerome Silva midugang og 11 ug 10 puntos matag usa.

Ang 6-foot-9 sa UC Webmasters nga si Junemar Fajardo ug si Cantonao maoy nangu sa West nga parehong adunay 10 puntos.

Tulo ka players sa East ang napili sa Mythical Five nga naglakip nilang Mercader, Lao, Silva, Cantonao ug Fajardo.  (BANATSPORTS)