Fya All-Star game ugma

CEBU, Philippines - Ang mga maayong laking players nga nagkumbate karon sa nagpadayong 2nd F. Llamas Youth Association (FYA), mopakita sa ilang abilidad ugma sa gabii aron pagpahigayon sa ilang kaugalingong Light vs. Dark All-Star Game dito sa Vicente Sotto Memorial Gym in barangay Punta Pricnesa, this city.

Ang All-Star Game pasi-unhan sa Rookies vs. Sophomores Game diin mosalida ang mga bag-ong sakop sa FYA nga karon lang tuiga mosalmot sa grupo batok sa mga sakop nga nakaduwa na sa miaging tuig pinasikad sa ilang master list.

Gawas sa naandang duwa sa Light vs. Dark, magtakos sab ang mga tirador sa FYA atol sa 3-Point Shootout aron ipakita ang ilang abilidad sa shooting ug ang mga mas abrik ug paspas modagan maoy mag-abot sa buzzer-beater contest o gitawag sab ug obstacle race.

Matag team adunay mo-representar nga usa ka player sa 3-point shootout ug sa buzzer-beating contest. Adunay walo ka teams nga misalmot sa FYA karong tuiga.

Ang mga mosalmot sa 3-point shootout ug sa buzzer-beater contest, mao sila si Baeng Medalle ug Almark Albarracin sa topseed Viking Haulers, Tata Laborte ug Danding Almond sa second-seed Heartfelt, Noel Medalle ug Mark Labrador sa third-seed Simpolang Barbekyuhan, Wilson Guy ug En-en Tolentino sa fourth-seed Park ‘N Go Bakeshop, Erik del Cerna ug Jaime Atuel sa fifth-seed Kkaroz, Michael Garcia ug Dondon Rama sa sixth-seed Angelica, Dondon Cadungog ug JR Laurente sa CRV ug Bornong Endrina ug Eking Marata sa Leo & Rolly.

Ang CRV ug ang Leo & Rolly natagak na sa maong torneyo kinsa maoy nahimutang sa ika-pito ug ika-walong pwesto. Ang Leo & Rolly nga migamit Rollyr Boyz jerseys sa miaging tuig, maoy defending champions.

Si Garcia sa Angelica maoy defending champion sa 3-Point shootout ug si Marata sa Leo & Rolly maoy defending champion sa buzzer-beating contest.

Ang FYA semifinal games sugdan sa Huwebes. (BANATSPORTS)