Semis seselyuhan ng Lady Falcons, Stags
MANILA, Philippines - Tatangkain ng Adamson at San Sebastian na maseguro na ang puwesto para sa semifinals sa kanilang pakikipagtipan sa kani-kanilang mga katunggali sa pagpapatuloy ngayon ng quarterfinals round ng ikalawang conference ng Shakey’s V-League Season 7 sa The Arena sa San Juan.
Sa kanilang misyon na makapasok sa Final Four, sasagupain ng Lady Stags ang Far Eastern University sa alas-4 ng hapon habang makikipagbakbakan naman ang Lady Falcons sa Lyceum sa main event.
Pawang may 7-2 win-loss record, binigo ng SSC-R ang NU habang tinalo ng AdU ang FEU sa loob lamang ng apat na sets nitong Huwebes.
Pakay ng San Sebastian ang kanilang pang labing isang Final Four appearance sa premyadong volleyball league ng bansa habang ang pakay naman ng Adamson ang kanilang ikapitong pagsabak sa semis.
Upang maisakatuparan ang kanilang misyon, muli na namang babandera para sa mga taga-Legarda si Thai import Jaroensri Bualee kasama sina Suzanne Roces, Joy Benito, Melissa Mirasol at Jennelyn Belen kontra sa FEU na pamumunuan nila Rachel Anne Daquis at Michelle Carolino katuwang sina Cheery Mae Vivas, Monique Tiangco at Gyzelle Sy.
Sasandig namang muli ang Adamson kina guest players Nerissa Bautista at Mic Mic Laborte upang mapigilan ang Lyceum sa pangunguna ni dating MVP Mary Jean Balse na tumirada ng season-high 37 puntos nitong Huwebes laban sa Ateneo.
Aalalay naman sina Pau Soriano, Angela Benting at Gail Martin ang dalawang guest players ng mga bataan ni coach Minerva Dulce Pante habang susuporta kay Balse sina Dahlia Cruz, Joy Cases at Nikki Tabafunda.
Sa inisyal na laro naman, asam ng Ateneo na makabangon mula sa five-set loss kontra Lyceum nitong Huwebes rin sa kanilang pakikipagbuno kontra NU.
- Latest
- Trending
