Nakabihag na sab ang Wildcats

CEBU, Philippines - Mitukob na sab og laing daog ang Cebu Institute of Technology-University (CIT-U) Wildcats bisan ilang giusikan ang 20 puntos nilang labaw sa fourth period ug ning higayona batok sa Don Bosco Technology Center (DBTC) Greywolves , 91-82 alang sa ilang labing unang back-to-back nga kadaugan sa 10th   Cebu Schools Athletic Foundation, Inc. (CESAFI) basketball event niadtong Martes sa gabii diha sa Cebu Coliseum.

Bag-o lang mihaw-as og 94-92 nga upset batok sa University of San Jose-Recoletos (USJ-R) Jaguars, ang Wildcats nagkaduol na sa ilang record nga three-game winning run sa CESAFI apan kana kun motugot kanila ang undermanned apan kuyaw nga University of San Carlos (USC) Warriors karong gabii sa bugtong collegiate match.

Sa kasamtangan, ang Wildcats nagtangag og 3-2 nga baraha.

Buot sab mokulit og school history ang giilang kanhi whipping boys sa CESAFI nga Cebu Eastern College (CEC) Dragons diin tuyo nilang molangkat sa unang puwesto sa labing unang higayon sa dihang ilang sangkaon ang eksperensiyadong   University of Cebu (UC) Junior Webmasters.

Si Arnel Ipang maoy mihatag sa Wildcats sa ilang labing dakung labaw nga 21 puntos, 81-61 sa nahabiling 6:42 sa fourth period, apan inay maluya, kalit lang nagmangtas ang daw samaran nga Greywolves ug misumbalik pinaagi sa nag-aso-asong rally aron mosuway og sikit ngadto sa siyete puntos, 82-89 human sa basket ni Clarito Hernando Jr. Hinuon, ang Greywolves nahutdan sa oras tungod kay aduna na man lang 30 segundos ang nahabiling oras.

Sa pagka-wala ni Curso, si Floyd Taboada maoy mitubos sa opensa aron pangulohan ang Wildcats sa iyang 23 puntos. Ang   rookie nga si Jose Allan Dimco midugang og 20 puntos, samtang si Ipang mihipos og 14 puntos.

Ang kadaugan maoy ikatulo sa Wildcats sud sa lima ka duwa ug ilang unang back-to-back wins sa CESAFI.

Bisan pa’g daghan ang iyang sipyat sa free throws, nakahimo gihapon si Aldave og 20 puntos aron pangulohan ang Greywolves, samtang si Jan Pons Geraga midugang og 16 puntos ug sila si Hernando ug Airell Tirado nagkumboya og 21 puntos.

Puntos Matag Usa

CIT (91) - Taboada 23, Dimco 20, Ipang 14, Dela Cerna 9, Batiquin 8, Cabanero 6, Booc 3, Del Mar 3, Alvarez 3, Cañete 2

DBTC (82) - Aldave 20, Geraga 16, Hernando 11, Tirado 10, Cinco 7, Castro 7, Cortes 5, Echavez 4, Pogoy 2. – BANAT NEWS