Banal nanumpa

CEBU, Philippines - Atubangan sa iyang mga Bol-anon dumadapig, si ALA Boxing Gym fighter AJ 'Bazooka' Banal misaad og impresibong away batok ni kanhi WBO interim super flyweight champion Big Yoo sa ilang WBO Asia-Pacific bantamweight title bout sa main event sa "Sandugo: Labanan ng mga Kampeon" card ugma sa gabii didto sa Carlos P. Garcia Sports Complex sa Tagbilaran City.

"Ako ikapasalig nila nga maningkamot gyud ko aning duwaa kay para ni sa akong pamilya ug sa akong mga fans nga hilig og boksing, labaw na sa mga Boholanos," matud pa ni Banal

Human niya makita ang fighting stance ni Yoo, nahibaw-an ni Banal nga dili sayon ang away nga iyang sagubangon sa Sabado, apan iyang paningkamotan nga modaog aron may purohan pa nga mo-away pagbalik alang sa world title.

"Maayo kaayo ang iyang style ug kabalo motan-aw sa iyang kontra. Dili kompiyansaan kay manukmag gyud," matud pa sa garbo sa Brgy. Ermita. "Lig-on sab siya, pero ambot lang kaha kung maigo siya sa akong kinumo. Wala ko kabalo unsay mahitabo basta Ginoo na lang mag-igo ani."

Si Banal (21-1, 17KOs) namahayag usab nga lahi nga inawayan ang masaksihan karon sa iyang mga fans nga iyang gamiton batok ni Yoo (16-2, 11KOs) nga wala pa matumba sa tibuok niyang karera sa boksing.

Kun masuwertihan batok ni Yoo, ition dayon ni Banal ang iyang atensiyon alang sa laing world title shot. "Daghan gyud ko plano pero nagdepende ko sa akong manager kay sila man naghatag og duwa nako. Pero bisag kinsa man nga champion akong kontrahon basta naay bakus ug naay offer," saysay ni Banal.

Ang maong boxing event, gidalit sa ALA Promotions ug ABS-CBN Sports uban sa suporta sa Sandugo Foundation Inc. ug sa Tagbilaran City Government ubos sa liderato ni Mayor Dan Neri Lim.  – BANAT NEWS