Ragaza bida sa Violet team

CEBU, Philippines - Nahimong bida si Openg Ragaza sa kadaugan sa Violet team nga naka-ipsot bitbit ang 91-90 nga kadaugan batok sa Yellow team sa nagpadayong Phase 3 Camella Homes Sunday Basketball Club tournament didto sa Villa Magallanes gym sa Lapu-Lapu City.

Ang lay-up ni Ragaza gikan sa assist ni R. Cortes sa katapusang 10 segundos sa final period maoy mikandado sa kadaugan alang sa Violet nga nagbitbit na og 2-1 nga baraha.

Si Ragaza mikutlo og 25 puntos, apan si Centes Brañanola maoy topscorer sa Violet pinaagi sa iyang 27 puntos, samtang si Cortes adunay otso puntos.

Sa gihapon, ang naparot nga Yellow team nga nagtangag og 1-2 nga baraha gipangulohan ni Alan Sepe sa iyang 34 puntos, gisundan ni Ruelan Sumilang nga adunay 28 puntos.

Sa laing bahin, ang Rollway Freighters yano kaayong mikulit sa ilang ikaduhang kadaugan human nila gilubong ang RMA Cargo sa iskor nga 123-111 sa "out-of-town" game niadtong Sabado didto sa Ocean Pearl Beach Resort basketball court sa Tabango, Leyte.

Unom ka players sa Rollway ang mirehistro og double figures sa pagpangulo ni Allen Tarona nga miburak og 26 puntos.

Si Moncrief Rogado mihakot og 17 puntos, si Romel Luceno miabuno og 15 puntos alang sa RMA Cargo nga wala pa makatilaw og daog sud sa tulo ka duwa.

Ang duwa didto sa Leyte gipaluyohan sab sa Ocean Pearl Beach Resort.

Puntos Matag Usa

VIOLET (91) - Brañanola 27, Ragaza 25, Cortes 8, Plenos 6, Aparente 6, Balberona 6, Almacin 5, Vega 4, Tongol 4

YELLOW (90) - Sepe 34, Sumilang 28, Geraldez 10, Villapez 4, Maratas 4, Puno 4, Rodriguez 4, Tabana 2

ROLLWAY FREIGHTERS (123) - Tarona 26, Resilla 22, Morata 17, Berido 14, Panaguiton 12, Amores 10, Casquejo 8, Palad 6, R. De la Pieza 4, D. De la Pieza 2, Rosatase 2

RMA CARGO (111) - Rogado 17, Luceno 15, Herrera 11, Heraga 11, Cortes 11, Camacaylan 9, Ocaña 8, Ocampo 8, Tecson 8, Reyes 7, Aropo 6. – BANAT NEWS