Losiaboi nag-una sa 1st Quota International Run

CEBU, Philippines - Nakabawi ang Kenyan missionary nga si Simon Losiaboi human niya gisakmit ang titulo sa Quota International 12K Classic kagahapon didto sa The Terraces ground of Ayala Center-Cebu.

Human siya ma-disqualify sa miaging 2nd Rotary Run tungod sa pag-ilis niya og race number nga wala mipahibalo sa technical committee, si Losiaboi midominar pagbalik dihang iyang gitapos ang lumba sud sa 39 minutos ug 37:55 segundos.

Si Losiaboi gisundan sa taga-Davao nga si Elmer Bartolo kinsa naabot sa finish line sa oras nga 41:05:90, samtang si Jobert Carolino maoy third placer sa oras nga 42:13.41.

Sa iyang bahin, wala gihapon matandog sa iyang pwesto si Mary Grace de los Santos isip reyna sa Cebu race dihang gisakmit niya ang korona sa 12K women's class sa oras nga 48:29.63. Ang Sugbuanang si Madelyn Carter mipahiluna sa ikaduhang dapit sa oras nga 50:21.42 ug si Joeyry Ann Lee maoy ikatulo sa oras nga 5:16.80.

Samtang sila si Reprinel Banzon (20:11.72) ug Mary Joy Tabal (24:43.57) maoy nangharus sa 6K Open.

Sa laing bahin, nasagulan usab og kasubo ang maong lumba human madasmagi og motorsiklo ang kanhi USPF runner nga si Revodem Aranas kinsa daling gidala sa tambalanan ug posibleng operahan sa iyang walang tiil.

Si Aranas nag-una na unta padulong ngadto sa finish line, apan kalit kining nadasmagan sa usa ka habal-habal duol sa JY Square Mall sa Brgy.Lahug. (Lemuel P. Maglinte)   (BANATNEWS)