CEOBSA nidominar sa barrel race

CEBU, Philippines - Gidominar sa host Cebu Equine Owners, Breeders and Sportsmen Association (CEOBSA) ang barrel race sa bag-o lang natapos nga 2010 Governor Gwen Garcia Cup Horse Show and Competition diha sa Mandaue City reclamation area.

Ang bisitang cowboys gikan sa Malaybalay mipakita sab og maayong labok, apan ang CEOBSA nakahimo pagpanalipod sa ilang balwarte.

Giharos sa CEOBSA ang ladies open action, uban sa guest rider gikan sa Bohol ubos sa Cebu team Jenica Eleazar nga midaog sa labing taas nga puwesto. Sila si Alyssa ug Anne Lawrence maoy mi-okupar sa ikaduha ug ikatulo nga dapit.

Si Matthew Miñoza mitunol sa CEOBSA sa ilang ikaduhang titulo ubos sa youth division. Iyang gipukan ang iyang kaubang si Kyle Miole, samtang si John David Maestrado sa Impasungon nalandig sa ikatulo.

Laing guest rider sa CEOBSA nga si Patrick Eleazar, pakyas sa iyang tinguha paglangkat sa korona sa novice category human mapilde ngadto ni Clinton Corona sa Malaybalay, samtang si Amor Mahistrado sa Impasugong mikapyot sa ikatulo.

Giharos sa Malaybalay ang unang tulo ka luna sa intermediate division kortesiya nilang Dondon Paano, Leo Paano ug Derby Casibe.

Sama ni Eleazar, si Arnel Martinez napakyas pagdaog sa titulo human mabuntog ni Ronaldo Gonzaga. Si Marlo Aquino mi-okupar sa ikatulo nga dapit.

Si Iko Roa sa Cagayan de Oro, maoy naghari sa premiere experts category uban sa oras nga 19.39 segundos. Si Adam Sulogan sa Malaybalay mipahiluna sa ikaduha sa iyang 19.49 segundos, samtang ang iyang teammate nga si Ben John Mahistrado napunta sa ikatulo nga mi-oras og 19.57 segundos.

Si Jojo Mahistrado maoy napiling best rider sa royals uban ang oras nga 21.23 segundos sa barrel race, gisundan ni James Dinsa sa Bacolod sa iyang 21.95 segundos.    (BANATNEWS)