Lambo hari sa Sinulog Criterium

CEBU, Philippines - Gipuhalan ni Tyre Lambo ang abilidad ni JV Araneta aron masakmit ang titulo sa Sinulog Criterium niadtong miaging adlaw diha sa North Reclamation Area sa Mandaue City.

Si Lambo misakmit sa titulo sa third leg sa maong cycling race sa C2 class.

Sa iyang bahin, si Araneta nga maoy kampiyon sa miaging buwan pakyas pagkuha sa ikaduhang sunod-sunod nga titulo ug mipahiluna lang sa ikaduhang luna.

Sila si Alan Pastor ug Nanie Quijano mitugpa sa ikatulo ug ikaupat nga dapit.

Sa second outing, migawas nga hari si Lito Quebec, gisundan nila ni Tats Codina ug Hyde Esmalin alang sa ikaduha ug ikatulong luna , samtang laing beteranong cyclist nga si Rolando Pagnanawon maoy nanghawod sa class B batok nila ni Ome Rodriguez ug Roger Lastimoso isip runners-up.

Sa laing bahin, karong weekend, mag-abot ang tanang dekalibreng cyclists alang sa laing edisyon sa Recycle-Luvismin-USA Cycling Series nga naila sab nga “Tour ni Frank”.    (BANATNEWS)