MRS Tigers mihasmag sa Boyla sa LLBA Christmas League

CEBU, Philippines - Mitangag na sab og laing daog ang MRS Tigers sa ilang bugno batok sa Boyla, 65-55 sa nagkainit nga Lapu-Lapu Basketball Association (LLBA) Christmas League 2009 didto sa Villas Magallanes Gym sa Sta. Lucia Property, barangay Basak dakbayan sa Lapu-Lapu.

Upat ka players nga gipangulohan ni Amot Jumao-as ang misansan og double figures alang sa ikalimang daog sa mangtas nga MRS Tigers. Si Jumao-as mikulit og 18 puntos, gisundan ni Archie Ompad nga adunay 13 puntos, samtang sila si Billy Nadado ug JR Guido milawog og 10 puntos matag usa alang sa Tigers ni team owner Tigre Inot.

Igo lang milabaw og dos puntos ang Tigers paghuman sa unang 10 minutos sa duwa, 20-18, apan nag-wild kini sa sunod nga kuwarter aron padak-an pa ang labaw ngadto na sa siyete puntos sa halftime, 31-24.

Miaksyon og gukod ang Boyla sa third period sa pagpangulo ni Jun Medina ug team owner Tonton  Gilig sa tuyo nga mailog ang tiyempo sa duwa. Hinuon, ang Tigers nakarekober dihang ila lang gipa-iskor og nuybe puntos ang Boyla sa fourth period, 16-9.

Si Medina maoy topscorer sa Boyla pinaagi sa iyang 14 puntos, samtang si Gilig miabuno og 11 puntos sa maong kapildihan.

Sa laing duwa, ang Ace Penzionne sa trayanggulo nilang Sammy Lapoja, Arnel Patalinghug ug Pader Decembrano, naka-eskapo gikan sa All Box Packaging Corp. bitbit ang 59-57 nga kadaugan.

Si Lapoja mibahog og 28 puntos, gisundan ni Patalinghug sa iyang 15 puntos ug si Decembrano adunay 14 puntos alang sa Ace Penzionne ni team owner Tony Amistad.

Ang All Box ni Jun Tan gipangulohan ni Michel Quijano, kinsa mi-iskor og 19 puntos, si Dondon Sevilla mitampo og 16 puntos, samtang si Edgar Lungay miamot og 12 puntos.

Sa lain pang aksiyon, ang AJY-Bong walay kukaluoy nga midemolis sa Yan C Rico sa iskor nga 70-55.

Sa maong kadaugan, ang AJY-Bong ni commissioner Allan Yu temporaryong naghari sa liderato nga adunay 7-1 nga baraha, samtang ang Yan C Rico ni team owner Atty. Rico Amores nagbitbit og 3-4 win-loss record.

Si Tata Bardago maoy nangulo sa AJY-Bong sa iyang 17 puntos, samtang si Yu miburak og 13 puntos. Ang naparot nga Yan C Rico gipangulohan sab ni Alvin Bentazal, kinsa mipabuto og 22 puntos.

PUNTOS MATAG USA

Unang duwa:

ACE PENZIONNE (59) - Lapoja 28, Patalinghug 15, Decembrano 14, Aying 6, Cañete 2

ALL-BOX (57) - Quijano 19, Sevilla 16, Lungay 12, Hiyas 4, Edig 2, Aselom 2, Amodia 2, Aying 2

Ikaduhang duwa:

AJY-BONG (70) - Bardago 17, Yu 13, Ochea 9, Tampus 6, Acuña 6, Labadan 6, Igot D. 4, Igot C. 4, Daño 3, Cosep 2

YAN C RICO (55) - Bentazal 22, Bardago 8, Magat 6, Adlit 6, Alian 6, Simbajon 3, Iscuyos 2, Dela Peña 2

Ikatulong duwa:

MRS. TIGERS (65) - Jumao-as 18, Ompad 13, Nadado 10, Guido 10, Casio 8, Amores 5, Godinez 3, Cangsuco 2

BOYLA (55) - Medina 14, Gilig 11, Gloria 8, Tampus 6, Hiyas 6, Asuncion 5, Daluz 3, Tempurada 2    (BANATNEWS)