Talisay namupo og awards sa Gullas Cup

CEBU, Philippines - Namupo og award ang Talisay City human sa ilang triple championships sa basketball ug volleyball (men and women) categories sa bag-o lang natapos nga 2009 Gullas Cup niadtong miaging adlaw didto sa Carcar Sports Complex.

Ang guwardiya nga si Roger Ray Pogoy ug spikers nga sila si Norvie Labuca ug Mechell Matuguina sa Talisay Aquastar mao ang nidaog sa MVP awards human nila gituboy ang tagsa-tagsa nila ka koponan sa kampiyonato.

Si Pogoy mao ang leading scorer sa Talisay, kinsa mipukan sa San Fernando Spartan   sa men’s basketball tilt, samtang si Labuca, kinsa mao usab ang “Best Libero” mao ang nahimong sinaligan sa Talisay volleyball team nga mikampiyon batok sa Carcar.

Sa women’s volleyball, si Matuguina, mao sab ang napiling “Best Blocker” human sa ilang kadaugan batok sa Carcar sa finals.

Gawas ni Pogoy, lakip usab sa mythical five ang iyang teammates nga sila si Christopher Obeso, Jun Vincent Pasilan sa San Fernando, Mariano Canonigo sa Minglanilla ug Jeruz Ceniza sa Naga.

Ang Talisay mibulsa og   P30,000, samtang ang second ug third placers nakaangkon og P25,000 ug P20,000 matag usa.

Ang maong torneyo nga gisalmotan sa lima ka siyudad ug lalawigan sa unang distrito sa Sugbu gipasiugdahan ni Kongresista Eduardo “Eddie Gullas uban ni Sam-Sam Gullas, isip tournament director. – BANAT NEWS