Semifinals sugdan karon

CEBU, Philippines - Upat ka mga lig-ong koponan ang magpinaksitay sa usa'g-usa sa pagsugod sa crossover semifinals sa Aloguinsan Mayor's Cup Open basketball tournament karong adlawa didto sa Aloguinsan gym.

Ang JDCC makigtakus batok sa Barili-Villa Mariska, samtang ang Ave Maria Sanctuary Park makigsangka batok sa Survivors Team.

Ang JDCC miabante sa semifinals human ilang gipalagpot ang Sunset View sa usa ka kulbahinam nga sangka nga nagdaog lang og dos puntos niadtong Sabado.

Nakasulod sab sa semis ang Villa Mariska dihang ilang gipalagpot ang Lauron Enterprises niadtong Domingo.

Ang modaog sa semifinals maoy mag-abot sa knockout finals unya sa Oktubre 18, samtang ang mga pildero maoy mag-ilog sa ikatulong dapit.

Ganting salapi ang nagpaabot sa mga mananaog. Ang kampiyon mobulsa og P80,000, ang second placer makadawat og P50,000, ang third placer makadawat og P30,000 ug ang fourth placer gantihan og P10,000.

Ang torneyo nahimong posible tungod sa pagpaluyo ni Aloguinsan Mayor Cynthia Moreno ug ni Vice Mayor Chonse Moreno uban sa Aloguinsan municipal council nga gipangulohan sa ilang sports committee chairman Elmer Biton. – BANAT NEWS