Marathon Clinic 2 himuon karon

CEBU, Philippines - Duha ka kanhi national triathletes nga naulipon karon sa dagan nga sila si Noy Jopson ug Chris Aldeguer ang mopaambit sa ilang kasinatian ug paagi kun unsaon pagsustiner sa taas nga lumba diin ang 01-10-10 Cebu City Marathon's Running Clinic part 2 ipahigayon karong hapon diha sa Parklane International Hotel.

Si Jopson, kanhi record-holder sa RP triathlon ug bag-o lang gibayaw isip best placed Pinoy entry sa Cobra Ironman Philippines, samtang ang kanhi basketball varsity nga si Aldeguer nilampos sa duha ka notadong international marathons, ang Las Vegas ug Hong Kong Marathon sa panahon nga nasakop siya sa RP triathlon squad.

Gawas sa duha, si Dr. Renald Ramiro ug ang nabantog nga running man nga si Raffy Uytiepo mopatim-aw sab sa maong kalihukan aron mohatag og dugang tips alang sa mga partisipante, kinsa nagtinguha nga modagan sa Cebu City Marathon nga gikatakda sa Enero sunod tuig. – BANAT NEWS