Larrazabal hari sa Pink October Run

CEBU, Philippines - Human niya gitapos ang makutas nga Robinhood Marathon didto sa England, mipakita na usab sa iyang katakus ang running eye doctor nga si Dr.Yong Larrazabal dihang siya maoy migawas nga kampiyon sa all-doctor’s category sa 2009 Pink October Run kagahapon diha sa Terraces sa Ayala Center Mall.

Si Larrazabal mitapos sa 10k run sa oras nga 44 minutos ug 54.33 segundos, nagsunod kaniya si Harem Deiparine sa oras nga 45:37.59 alang sa second place ug Raymund Bontol nga mirehistro og oras nga 46:37.59 sa third place.

Sa iyang bahin, si Maureen Watson mitapos sa lumba sa oras nga 58:19.37 alang sa kampiyonato sa womens category sa all-doctor’s. Sila si Emily Estrada (59:27.83) ug Nicole Chua (1:07:24.87) maoy mipahiluna sa ikaduha ug ikatulong dapit.

Sa 10k opens division, sila si Elmer Bartolo ug Mary Grace delos Santos maoy milabni sa kampiyonato. Si Bartolo maoy nanghawud sa men’s open sa oras nga 32:39.56 batok nila ni Joel Delposo (33:23.35) ug Revodem Aranas (33:41.03).

Si Delos Santos, milangkat na usab og laing kampiyonato human siya manghawud sa women’s division sa oras nga 40:41.56, gisundan nila ni Mary Hoy Tabal (41:53.01) ug Joeyry Lee (43:26.31) sa second ug third place.

Gidominaran usab ni Joebert Carolino ang 5k division uban nila ni Eugene Delposo ug Felix Lopez nga maoy runner-ups, samtang sila si Aiza Suwaybaguio, Margie Apostol ug Girlie Rose Baylon maoy top three finisher sa 5k women’s division. - Lemuel P. Maglinte (BANAT NEWS)