Cotto pababagsakin ni Pacquiao-Roach

MANILA, Philippines - Kagaya ng inaasahan, muling naghayag ng kanyang prediksyon si American trainer Freddie Roach ukol sa megafight nina Manny Pacquiao at Miguel Angel Cotto.

Sa panayam ng pahayagang Primera Hora kahapon, sinabi ng 49-anyos na si Roach na pababagsakin ng 30-anyos na si Pacquiao ang 28-anyos na si Cotto sa kanilang laban sa Nobyembre 14 sa MGM Grand Garden Arena sa Las Vegas, Nevada.

Kumpara kina Mexican-American David Diaz, Puerto Rican-American Oscar Dela Hoya at Briton Ricky Hatton, hindi nagbigay ng prediksyon si Roach kung anong round mapapatulog ni Pacquiao si Cotto.      

“I do not have anything bad to say about Miguel Cotto,” ani Roach sa kasalukuyang World Boxing Organization (WBO) welterweight champion. “I believe he is an excellent athlete who always gets ready for his fights, but I am confident in Manny’s abilities and we are going to knockout Cotto.”

Magkikita si Pacquiao, ang bagong International Boxing Organization (IBO) light welterweight titlist, at si Cotto sa 145 pound division.

Nagkatotoo ang prediksyon ni Roach na patutumbahin ni Pacquiao si Diaz sa ninth round noong Hunyo 26, ngunit hindi naman umabot sa ninth at third round sina Dela Hoya at Hatton noong Disyembre 6 at Mayo 3, ayon sa pagkakasunod.

“Without a doubt, there will be a war. Manny and Miguel have many similarities in their fighting styles, but Manny’s speed will be too much for Miguel,” sabi ni Roach kay Pacquiao, nagdadala ng 49-3-2 win-loss-draw ring record kasama ang 37 KOs, kumpara sa 34-1-0 (27 KOs) ni Cotto.

Isang eight-week training ang ihahanda ni Roach para sa preparasyon ni Pacquiao kay Cotto.

“Medyo mahaba pa rin ang nalalabing panahon para umpisahan ang training, kaya naman gugugulin ko ang mga oras na ito upang makasama ang a-king pamilya,” sabi naman ni Pacquiao. (RC)