M.A.D. for Wellness mosikad karon
CEBU, Philippines – Liboan ka mga runners ang magginukdanay sayo ning buntag sa pagsikad sa "Running M.A.D. for Wellness" diha sa University of the Philippines Visayas-Cebu College grounds.
Ang lumba nga adunay tulo ka kategoriya -- 3K, 6K, 12K sugdan sa alas-5:30 sa buntag.
Si Leizl Lumindas-Getaruelas maoy paborito nga modaog sa korona sa 12K division. Lain sab nga tang-ang runners nga sila si Madelyn Carter ug ang pambato sa Zamboanga City nga si Mary Grace delos Santos, kinsa maoy kampiyon sa miaging MILO Marathon Cagayan de Oro leg.
Sila si John Philip Dueñas ug ang managsuong Eugene ug Joel Delposo mao sab ang higpit nga karibal alang sa men's open title.
Mga sikat nga personalidad sama ni ABS-CBN news anchor Atty. Haidee Acuña, GMA news anchor Jun Veliganio, Sambag I Brgy. Captain Jerry Guardo ug si Lahug Brgy. Captain Mary Ann De los Santos ang modagan sab karong adlawa.
Ang first placer makadawat og P3,000, samtang P2,000 ug P1,000 madawat sa second ug third placers.
Ang top three winners sa 6K mobulsa og P1,500, P1,000 ug P500.
Ang lumba gipasiugdahan ni Lahug Brgy. Captain Mary Ann de los Santos uban sa abag nila ni race coordinator ug The Freeman sports columnist Raffy Uytiepo, Sportswriters Association of Cebu (SAC) president John Z. Pages ug kanhi Tinago barangay captain Joel Garganera. – BANAT NEWS
- Latest
- Trending
