Duha ka game 7 tiwason karong adlawa

CEBU, Philippines - Duha ka Game 7 ang tiwason karong adlawa sa nagpadayong NBA Conference semifinals diin suwayan sa defending champion Boston Celtics ug Los Angeles Lakers pagdaug sa ilang tagsa-tagsa ka serye—Celtics batok Orlando Magic sa East semis ug Lakers batok Houston Rockets alang sa West semis didto sa ilang homecourts.

Ang modaug tali sa Celtics ug Magic maoy mo-abante sa East Finals batok sa nagpanikad na pag-ayo ug play-off perfect Cleveland Cavaliers samtang ang modaug tali sa Lakers ug Rockets maoy mo-abante sa West Finals batok sa nagpaabot nang Denver Nuggets.

Beat L.A. mao karon ang panawagan sa mga Rockets fans samtang buot sab sa Lakers nga sayong biyaan ang Rockets aron dili na kini makarekober.

Matod pa ni Ron Artest “We’ve been through so much, that’s been the story of the season. We’ve down, but we never fall and we’re never counted out.”

Mao kini ang giluwatang panahom ni Artest human sa ilang 95-80 nga kadaugan sa Game 6 didto sa Toyota Center sa Houston, Texas.

Apan alang kang Kobe Bryant, wala sila’y laing mahimo ug tumong kung dili ang pagdaug lang karong adlawa.
Sa laing bahin, gi-angkon ni Magic coach Stan Van Gundy nga kung dili sila modaug sa Game 7, dili na kini matawag ug bounce back. ang pulong bounce back unya pa sa Nobiyembre atol sa laing NBA season.

Ang Magic nakapugos ug game 7 human sa ilang 83-75 nga kadaugan sa Game 6 didto sa Amay Arena sa Orlando, Florida.
Si coach Doc rivers sa Celtics nagkanayon “ Game 7 is the ultimate player’s game. I’ve always thougth that. If you need a rah-rah speech for Game 7, your team’s probably in a little trouble.” Si Rivers nagkanayon nga ang ilang execution sa game plan maoy mas importante kay sa iyang mga coaching tips.

Sa iyang bahin, ang triple-double artist sa Celtics nga si Rajon Rondo mi-angkon nga wala sila kahutdi og hangin atol sa Game 6 apan daghan silang sipyat ug turnovers nga gibaslan ug puntos sa Magic.

Sa miaging tuig, nag-agi una og Game 7 ang Celtics sa wala pa nila hingpit gitaktak ang Cleveland. Ang Celtics adunay record nga 17-3 sa ilang korte sa Game 7 series. - Gabby G. Malagar (BANAT NEWS)