Diaz, Taimanglo babandera sa FFC-Fearless 9

MANILA, Philippines - Babanderahan nina Ryan Diaz at Baby Joe Taimanglo ang blockbuster fight card sa Fearless Fighting Championships - Fearless 9, na sasambulat sa Abril 4 sa Ynares Sports Arena sa Pasig City.

Sinisiguro ng organizers ang isang kahindik-hindik na aksiyon sa pagitan ng mga pangunahing mixed martial arts practitioners at foreign grapplers na maglalaban-laban para sa karangalan at kayamanan sa octagon arena simula alas-7 ng gabi.

Ito ay kinabibilangan din ni Diaz, na pinangalanang The Lion at si Taimanglo naman The Juggernaut, ang mag-aagawan para sa lightweight (149 lbs) crown, habang itataya naman ni wushu experts Joel Amurao ang kanyang featherweight (129 lbs) title kontra kay Kid Rodel Orais.

Mabigat na aksiyon naman ang nasa pagitan nina Razi Jabarri at Cesar Yarte sa isa pang title showdown sa middle-weight (169 lbs) division ng event na tinaguriang “Uprising” na itinalaga ng Fearless Promotions Inc. sa kooperasyon ng Makisig Network Inc.

Ang event ay suportado din ng Metrocard Club, PAGCOR at Philippine Charity Sweepstakes Office at Superb Security Agency kasama ang Malaya, Business Mirror, I-Mag, Phil. Graphic, I-Watch, Magic 89.9, NU 107 at YES-FM bilang media partners.

Ang mga tiket ay nagkakahalaga ng P580 sa VIP at P265 para sa Upperbox. Para sa ilang detalye, kontakin ang TicketNet sa 911-5555.