SMC ug WYSS kampiyon sa Camotes

CEBU, Philippines - Gibaswat nilang Eric Zanoria ug Eliud Poligrates, ang duha ka pambato sa SWU Cobras ang ilang team nga Santiago-SMC quintet batok sa UE team pinaagi sa pag-iskor og 94-80 nga kadaugan aron sakmiton ang korona sa seniors division sa tinuig nga San Francsico (Camotes) basketball tournament didto sa San Francisco municipal hardcourt.

Sa juniors division, ang Wyss Esperanza ni coach Gary Muaña maoy misakmit sa korona human ilang gilubong ang Queen Gem Pharmacy sa iskor, 105-85 atol sa duha ka finals matches kaniadtong Sabado sa gabii.

Atol sa semifinals kaniadtong Biyernes, ang SMC midaug sab og daku-dako batok sa UE nga hapit sab magkatakdo ang iskor sa duwa tali sa nagribal nga teams, 94-81 samtang gilubong sa Wyss ang Queen Gem ug 16 puntos sa iskor, 98-82.

Si Bruce Cunningham, usa ka Amerikano nga gikan sa Fort Wayne, Indiana kinsa temporaryong nagpuyo sa lungsod sa San Francisco uban sa iyang Pinay nga asawa nga si Dixie, maoy mohatag sa Banat Sports sa resulta sa duwa.

Ang iyang pagkamahiligon ug dagat maoy nakapaaghat kaniya nga mopuyo sa Pilipinas ug gani pipila lang siya sa daghang langyaw nga mitawag sa Pilipinas nga “paradise” kon paraiso tungod sa maanindot nga kinaiyahan.

Nakadayeg sab si Cunningham sa abilidad sa mga Sugboanon nga basketbolista ug maoy nakapadani kaniya nga magtukod og lega Camotes High School Basketball League (CHSBL).

Si Poligrates maoy bida dihang gihatagan niyag luna sa finals ang SMC pinaagi sa iyang 27 sa semifinals ug si Zanoria maoy misubang sa finals aron pagsakmit sa korona pinaagi sab sa iyang 27 puntos gihapon.

Si Milfred Sampelo maoy nangu sa UE sa iyang 28 puntos apan mi-iskor siya’g 29 puntos atol sa semifinals.

Si Valentino Guevarra maoy nangu sa Wyss team pinaagi sa iyang 32 puntos batok sa Queen Gem Pharmacy nga gipanag-iya ni Jose Rizaldy Nagsuban kinsa igo lang mitampo og dos puntos. Ang iyang asawa nga si Gemma Leah Garciano-Nagsuban usa ka doktora.

Puntos kada usa:

Juniors Division:

Wyss Esperanza (105)— Guevarra 32, Maurillo 29, Maurillo 20, Alamcin 10, Andrade 7, Gonzaga 5, Gonzaga 2

Queen Gem Pharmacy (85)— Lucernas 22, Pulvera 19, Muaña 18, Delfin 13, Herda 2, Arquillano 2, Zurita 2, Nagsuban 2

Seniors Division:

SMC (94)— Zanoria 27, Barebe 26, Poligrates 16, Donaire 10, Lumantas 10, Donaire 2, Salazar 2

UE (80)— Sampelo 28, Luga 17, Valeroso 13, Caputolan 12, Laurel 8, Muaña 2. - Gabby G. Malagar (BANAT NEWS)