RP umusad sa semis sa Davis Cup

MANILA, Philippines - Pinayuko ni Fil-Am Cecil Mamiit si Martin Sayer ng Hong Kong, 6-4, 4-6, 3-6, 7-6 (4), 9-7, upang ibigay sa Philippines ang semifinals berth sa Asia-Oceania Zone Group II Davis Cup competitions sa Victoria Park sa Hong Kong.

Naisalba ng 32 anyos na si Mamiit ang match point sa ikaapat na set, natalo ng dalawa sa kanyang ikalimang frame ngunit bumawi para iselyo ang tagumpay matapos ang apat na oras at 10 minutong bakbakan.

At dahil sa panalong ito, naging exhibition game na lamang ang bakbakan sa pagitan nina Fil-Am Treat Conrad Huey at Hiu Tung Yu.

Ang tagumpay ding iyon ang nagpanatili sa dominasyon ng Pinas laban sa Hong Kong, na nanatiling walang talo sa anim na pagkikita.

Haharapin ng Philippines ang Pakistan sa semis na nakatakda sa July 8-10 sa Pakistan.

Umabante ang Pakistanis sa pamamagitan ng 3-0 sweep sa Oman.