Badian champ sa cluster 2

CEBU - Mipatigbabaw ang Badian sa cluster 2 human gipukan ang Boljoon sa sunod-sunod nga sets atol sa ilang championship game sa 4th Governor Gwen Garcia Unity Volleyball (GUV) Cup For Women niadtong Domingo didto sa Moalboal.

Ang Badian mi-iskor og 25-13, 25-12 nga kadaugan batok sa Boljoon aron paghari sa cluster 2-A.

Naglaum ang Boljoon nga makabawi dihang nasukarap kini sa miaging tuig, apan napakyas na sab kini kay gipangandaman og maayo sa Badian ang ilang sangka.

Ang Boljoon maoy unang cluster 2 title holder, apan ang Badian maoy nidominar sa maong grupo sud na sa tulo ka tuig.

Sa miaging tuig, ang Boljoon nakasinati og maot nga performance ug gani napakyas kini pag-abante sa cluster championship human mapilde ngadto sa Oslob atol sa ilang sub-cluster title.

Si Mechelle Matugina mihukom nga dili moduwa sa Boljoon ning tuiga diin iyang gibiyaan ang team nga walay star player.

Hinuon, ang Boljoon nakakuha’g kapuli nga si Russel Gernani, ang magduduwa kanhi sa Southwestern University (SWU).

Sa wala pa nila ikasangka ang Boljoon, ang Badian niduwa pa’g duha ka duwa una pa moabante sa final battle.

Bisan pa sa kapildihan, ang Boljoon makarepresentar gihapon sa cluster 2 uban sa Badian sa nanghinapos nga bahin ning tuiga kay ang duha ka teams sa matag cluster adunay chance nga makigtigi alang sa overall title ning maong kompetisyon nga gipaluyohan sa Cebu Volleyball Association (CEVA). (BANAT NEWS)