Cansojong milubong sa Biasong, 81-69

CEBU - Gipamatud-an sa Cansojong nga mas tang-an sila sa Biasong dihang ila kining gilubong, 81-69 sa Senior's division sa City of Talisay Mayor's Cup 2008 Basketball Tournament niadtong Domingo didto sa Talisay Sports Complex.

Tulo ka magduduwa sa Cansojong ang mikoykoy og double figures nga gipangulohan ni Emilio Aniñon, kinsa mibugha og 20 puntos.

Si Jaime Buena mipupo og 16 puntos ug si Earl Keith del Rosario miani og 10 puntos alang sa mabungahong duwa sa Cansojong.

Gidominar sa Cansojong ang kinatibuk-ang duwa diin ilang gitapos ang first quarter, 22-14.

Bisan pa niini, ang Biasong nakamaneho pagkitkit sa labaw ug miabot na lang og dos puntos, 54-52 paghuman sa ikatulong kuwarter.

Dali sab hinuon nga nakabawi ang Cansojong sa final quarter aron pag-inat og balik sa labaw ug wala na kini molingi pa sukad niadto hangtod nga nahurot ang gitagal nga oras sa maong duwa.

Sila si Archie Abasanta ug Petronilo Cañon nagkumboya og 16 puntos alang sa Cansojong.

Ang naparot nga Biasong gipangulohan ni Federico Arañas Jr. sa iyang 27 puntos, apan nakawang lang ang iyang paningkamot kay wala kini makakuha og igong suporta gikan sa iyang kaubanan.

Sa laing duwa sa seniors, ang defending champion Tabunok 2 miugkat og laing daog pinaagi sa pagpukan sa Poblacion 2 sa iskor nga 87-79.

Ang Poblacion 2 igo lang milabaw og uno punto sa paghuman sa unang 10 minutos sa duwa, 21-20. Tungod sa hugot nga depensa ug sa way puas nga opensiba, nainat pa sa Poblacion 2 ang labaw, 47-38 sa first half.

Apan kalit nga mibutho si Peter Jake Alferez aron luwason ang Tabunok 2 pinaagi sa iyang nagtusaktusak nga opensiba. Si Alferez kinsa igo lang mi-iskor og nuybe puntos sa first half milansang og 19 puntos sa second half sa kinatibuk-an niyang 28 puntos aron pangulohan ang Tabunok 2. Si Kenneth Caparida miamot og 18 puntos ug si John Lester Sunga mitampo og 10 puntos.

Si Maiko Seguerra, kinsa mi-iskor og 16 puntos maoy nangulo sa pilderong Poblacion 2, gisundan ni Jo Florence Bas sa iyang 15 puntos.

Sa kumbati sa SK division, ang Tabunok I nakaipsot dihang ilang gipilde ang Lawaan I sa iskor nga 58-55.

Sila si Julius Caballero ug Jeyson Quijano nga pulos mikulit og 14 puntos maoy nangulo sa pag-ikyas sa Tabunok I, samtang ang Lawaan I gipangulohan ni Philip Jordan Isidro.

PUNTOS MATAG USA

Unang duwa:

(SK division)

TABUNOK I (58) -- Caballero 14, Quijano 14, Porosuelo 6, Cabañero 5, Gonzales 5, Loberanes 4, Cebes 3, Lapinid 3, Echavez 2, Zafra 2

LAWAAN 1 (55) -- Isidro 25, Bacatan 13, Lope 7, Cempron 4, Borgonia 4, Baraga 2

Ikaduhang duwa:

(Seniors)

TABUNOK 2 (87) -- Alferez 28, Caparida 18, Sunga 10, Tabar 9, Echavez 9, Jagupit 4, Rabaya 3, Campo 3, Cabuenas 3

POBLACION 2 (79) -- Seguerra 16, Bas 15, Dejan 12, Bascon 11, Reyes 6, Gerali 6, Antonio 4, Pacaña 4, Bartolaba 3, Pabelona 2

Ikatulong duwa:

(Seniors)

CANSOJONG (81) -- Aniñon 20, Buena 16, Del Rosario 10, Abasanta 9, Cañon 7, Rosagaran 4, Vargas 4, Marturillas 4, Abarquez 4, Pedros 3,

BIASONG (69) -- Arañas 27, Sequerra 11, Hogan 9, Abellana 8, Fabrica 5, Baller 4, Rama 3, Bas 2 (BANAT)