Dirtbike action sa San Remigio

Mosikad  na  karong  adlawa ang sunod-sunod nga dirtbike action adto sa Calambua, San Remigio diin ipahigayon ang endurocross ug ang motocross events.

Ang tigian karon nga giulohan og “Castrol Power 1 Enduro Challenge”  ang  kompetisyon nga gipresentar sa MS Motosuit.

Mao kini ang unang kalihukan sa Castrol sukad sa ilang pakig-alayon sa MS Motosuit, ang kasaligang tiggama og seat covers alang sa motorsiklo  ug sakyanan ug ingon man respetadong  organizer sa extreme  sports sa rehiyon.

Ugma, ang riders magtigi alang sa taas nga posisyon sa third leg sa 2008 MS Motosuit Motocross Series nga giulohan usab og 10th Ornopia Cup.

Ang maong kalihukan nga gipaluyohan sa Imarflex Battery, gilauman nga makakabig og dakung  numero sa  riders ug spectators.

Ang Ornopia Cup maoy forerunner sa MS Motosuit Motocross Series nga mao karon ang  labing daku nga  motocross series gawas sa Manila.

Masentro sa karera ugma mao si Glenn Aguilar ang numero unong rider sa Pilipinas. Si Aguilar mao sab ang official endorser sa MS Motosuit uban ni fast-rising Cebuano daredevil John Flores.

Si Aguilar makiglumba sa mga beterano ug sa umaabot  nga riders nga naglakip nilang Pepo Rubi, ang main man sa Castrol-Quickflight, reigning MS Motosuit  “Rider of the Year” Jovanni Abellar, Jonjon Adlawan, Ted Conde ug uban pa.

Gawas sa lumba,  ang  mga  dumuduong   mahimo sab  nga makadaog og  usa  ka  brand  new motorcycle  kortesiya sa Keiz BZ Motor Sales ni Seigfred Ornopia  nga  ripahon atol  sa maong kompetisyon.

“This is our own little way of sharing our blessings to those who have supported our races in Calambua for the past 10 years now,”  matud pa ni MS Motosuit big boss Lou Ornopia.

Ang duha ka adlaw nga kompetisyon gipaluyohan sab sa Castrol Power 1, Keiz BZ Motor Sales, Norkis Trading Corporation,  F&F Motorparts, Cebu Progress Manufacturing, LJ Marble & Construction Supply, RMO Motorsales, MS Digital Prints ug  888 Muffler Tech Header Core.