Cobras gilamoy sa Jaguars

Ang beteranong si Luther Luke Justiniani maoy nagdala sa iyang team ngadto sa malamposong kampanya pinaagi sa pagpangu sa University of San Jose Recoletos (USJ-R) Jaguars sa paglamoy nga buhi sa Southwestern University (SWU) Cobras, sa iskor 102-83 aron paglangkat sa korona sa 2nd La Fortuna Cup basketball tournament nga walay kulba kaniadtong Sabado sa gabii didto sa Cebu Coliseum sa dalan Sanciangko, ning dakbayan.

Krusyal nga three-pointers, mga lay-ups ug ingon man maanindot nga pasa ang gihimo ni Justiniani hinungdan walay misukwahi human ipahibalo nga siya maoy gipiling MVP. Si Justiniani maoy nangu sa Jaguars sa iyang 29 puntos. Bisan ang ilang coach nga si Edito Salacut nalipay sa gipakita sa iyang batos kay ang Jaguars wala gyud mopakita ug bisan gamay nga simbolo sa pagkuyap bisan pa man kung gi-unsa pag-depensa sa Cobras.

Hinuon ang mga sinaligan sa Cobras maoy wala maka-arte kay sila si Clifford Maguate ug Alfred Belande dili makapahimout ang natampo nga wala gani sila makahimo’g double figures.

Ang beterano sa Cobras nga si Eric Zanoria maoy nangu sa iyang 14 puntos.

Sila si Jessmar Villahermosa, Lyndon Gudez, Bobby Hatague and Armand Ponce maoy mi-abag kang Justiniani aron pagpukan sa Cobras nga daw sa nagkatibuwa-ag tungod sa lig-on nga depensa sa Jaguars.

Si Francis Sulijon sa Pepsi Cola, maoy mihatag sa trophy alang sa Cobras sa ingon man sa P10 mil nga cash samtang  ang organizer nga si magpapatigayon Lorenzo “Chao” Sy sa Fortuna Bakery ug Hotel Fortuna, maoy mitunol sa matahum nga tropeyo alang ngadto sa Jaguars ingon man usab sa P/15 mil nga premyo.

Puntos kada usa:

USJ-R (102) — Justiniani 29, Malinao 14, Villahermosa 12, Gudez 11, Hatague 11, Ponce 10, Delfino 8, Pateño 2, Pogoy 2, Bibera 2, Gabas 1

SWU (83) — Zanoria 14, Poligrates 12, Litorja 11, Diango 9, Maguate 9, Belande 8, Jalandoni 6, Canonigo 5, Gianchand 5, Armecin 2, Ceniza 2 Halftime: 46-43.