Flash Elorde nag-una sa Filipino boxing greats

Ang Sugbuanon ug kanhi world junior lightweight champion nga si Gabriel 'Flash' Elorde maoy no. 1 sa poll nga gipahigayon sa  kahugpongan sa boxing writers ug commentators nga ipasalida sa  QTV Channel 11 karong Domingo sa alas-6:00 sa gabii.

Ang survey naglakip sa nabantog na kaayong TV boxing personalities ug columnists nga sila si Ed Picson, Quinito Henson, Ed Tolentino ug Chino Trinidad.

Si Filipino ring idol Manny Pacquiao nitapos sa ikaunom sa survey nga gipangunahan ni Elorde kinsa naghari isip world champion sud sa pito ug tunga ka tuig.

Si Elorde nag-una sa poll human kini makakuha og  65 votes, diin iyang napuhalan ang unang Filipino world champion nga si Pancho Villa, kinsa sama ni Elorde, gituboy sab ngadto sa Hall of Fame.

Si Villa, kinsa nahimong world flyweight champion niadtong 1923, sikit kaayong nagsunod sa ikaduhang uban ang 63 votes.

Si Tokyo Olympic Games silver medalist Anthony Villanueva maoy ikatulo uban ang 56 votes, samtang ang former two-diviion world champion Luisito Espinosa nakakuha og 48 votes alang sa ikaupat nga dapit, gisundan ni Atlanta Olympics silver medalist Mansueto  'Onyok' Velasco, kinsa nakakuha og 43 votes aron sa pagpahiluna sa ikalima nga dapit.

Si Pacquiao kinsa napilde ni incumbent congresswoman Darlene Antonino Custodio sa miaging piniliay niadtong Lunes  nipatong sa ikaunom uban ang 39 votes. Si Dodie Boy Peñalosa, kinsa nahimong two-division world champion maoy ikapito uban ang 34 votes. Gisundan kini ni kanhi world flyweight champion Erbito Salavarria sa  no. 8 uban ang 33  votes.

Ang ikasiyam nga luna nakuha ni ex-world junior lightweight champion Rolando Navarrette sa iyang 25 votes.

Nikompleto sa top 10 mao si former WBC super flyweight champion Gerry Peñalosa nga adunay 19 botos.