Deadline sa Nike Elite Camp unya sa Enero 10

Gipahibalo sa Nike Elite Basketball Camp ubos ni Cebu coordinator Ramel Rasmo ang tanang high school coaches nga ang pagduso sa listahan sa tanang kwalipikadong magduduwa alang sa Cebu leg tryouts kutob lang sa Enero 10 diha sa Sacred Heart School-Jesuit athletics office.

Ang tryouts nga pagadumalaon nilang coach Eric Altamirano ug San Beda high school coach Ato Badolato himuon karong Enero 28 diha sa SHS gym.

Giawhag ni Rasmo ang tanang school coaches sa pagtuman mahitungod sa deadline tungod kay ang kwalipikadong magduduwa ipaubos pa og screening.

Sila si Remedio, Camilo Go sa USP-F ug Ancing Anciado sa SHS mopadala og unom ka players matag usa alang sa maong tryouts, samtang si Reggie Licanda sa UC adunay tulo. Bugtong si UV coach Delfin Pepito Jr. ang wala pa makaduso og pangan ngadto ni Rasmo.

Ang mahulbot dinhi sa Cebu ipadala sa Elite Camp sa Mamplasan, Laguna sa Marso 30 -Abril 4. Hatagan sila og libreng Nike outfits, lakip na niini ang sapatos ug jerseys.