'The Prince' mopakita sa abilidad vs. Polosan

Subli na sab nga ipakita ni Cary 'The Prince" Bullos ang iyang abilidad sa pagsikad sa Ultimate Submission Fight (USF) Ground & Pound II mixed martial arts competitions nga sugdan karong alas-6:30 sa gabii diha sa Cebu Coliseum.

Adunay upat ka kickboxing matches ang tigian ug walo sa mixed martial arts rumble, diin ang Sugbuanong si Bullos maoy usa sa mopakita'g aksiyon batok sa bisitang si Jonathan Polosan sa Cagayan de Oro City.

Ang duha ka undefeated fighters maoy mag-abot sa main event ubos sa light welterweight division.

Si Bullos, nagbitbit og limpiyong baraha nga unom ka daog, samtang si Polosan nakahipos og pito.

Gawas pagsaksi sa kulbahinam nga away, ang mga tumatan-aw makahigayon sab sa pagdaog og mga premyo ning maong kompetisyon nga gipaluyohan sa Island Paints, Cebu 28, Max Copy Center, Hotel Sogo, Large Form Ads, IPI ug Nature's Spring Water uban sa Makimsa Boutique, Ralph's Wine, Coca-Cola, K-1 Extreme Sportshop, Walker, The Freeman, igsuong mantalaan sa Banat News, Cebu Daily News, SunStar ug MOR Lupig Sila.

Ang mga tiket mapalit sa tag-P50 alang sa general admission, P100 sa upper box, P150 sa lower box ug P250 alang sa ringside.