Kumpiyansa ang PSC sa pagtaas ng 2006 budget

Kumpiyansa ang Philippine Sports Commission (PSC) na maaaprubahan ng Senado ang isinususog na House Resolution ni Bacolod City Rep. Monico Puentevella para sa kanilang P250 milyong pondo sa 2006.

Ayon kay PSC Commissioner Jose Mundo, inaasahan niyang pagbabasehan ng mga Senador ang naging performance ng Team Philippines sa nakaraang 23rd Southeast Asian Games.

"I think wala nang magiging problema itong proposed budget kasi okay naman lahat sa mga Congressmen eh. And I don’t see any reason why the Senators will kill this resolution," wika ni Mundo.

Matagumpay na nakuha ni Puentevella, dating PSC Commissioner, ang kabuuang 120 lagda mula sa Kongreso para pagtibayin ang kanyang House Resolution na nagtatakda sa sports commission na makakuha ng pondong P250 milyon buhat sa Department of Budget and Management (DBM).

"Kapag naayos na ‘yan sa Senado, tutuloy na ‘yan sa bicameral committee for the final approval," sabi ni Mundo. "Ihahanap ngayon ‘yan ng Department of Budget and Management ng source from the other government agencies na sobra ang budget."

Nauna nang ipinanukala ng DBM ang P27 milyon bilang 2006 budget ng PSC bago pa ang 2005 SEA Games kung saan tinanghal na overall champion ang Team Philippines sa kauna-unahang pagkakataon.

Nakakuha ang komisyon ng pondong P107 milyon mula sa DBM noong 2005.

"Kung ire-reenact lang ‘yung 2005 budget, definitely P107 million pa rin ang makukuha ng PSC, which is a lot better than the P27 million proposed by DBM," ani Mundo. (Russell Cadayona)