Mayor Ouano mi-inspection sa Mayor A.S. Fortuna Elementary School

CEBU, Philippines — Gisusi ni Mandaue City Mayor Thadeo Jovito “Jonkie” Ouano, kauban ang mga opisyales gikan sa City Disaster Risk Reduction and Management Office (CDRRMO) ug City Engineering Office, ang Mayor A.S. Fortuna Memorial Elementary School sa Barangay Guizo kagahapon Agosto 3.

Kini human sa grabeng pagbaha sa lugar diin daghan sa mga tinun-an ang na stranded niadtong miaging semana. Usa ka water pump ang gibutang ngadto sa tunghaan isip temporaryo nga pamaagi aron maminusan ang pagbaha sa tunghaan samtang mangita pa ang siyudad og long term solution sa problema sa pagbaha.

Atol sa inspection, si Ouano miingon nga ang tunghaan nahimutang sa ubos nga bahin kilid sa Tipolo Creek, hinungdan nga moawas ang tubig ngadto sa campus panahon sa kusog nga uwan ug madungan sa high tide.

Lakip sa gitan-aw nga solusyon mao ang pagpahigayon og dredging tungod kay nasuta usab nga dunay parte sa creek ang nigamay na ang agianan sa tubig tungod kay gipuy-an og mga informal settlers.

Gihangyo sa mayor ang mga residente nga nagpuyo sa lugar nga mokooperar sa plano sa siyudad aron masulbad ang pagbaha diin nasuta nga dunay 50 ka panimay ang nakaali na sa creek.

Niadtong miaging semana dunay mga tinun-an nga na trapped sulod sa eskwelahan human paspas nga misaka ang tubig baha, hinungdan nga ang mga sakop sa Mandaue City Disaster Risk Reduction and Management Office, pinaagi sa pag abag sa Guizo Barangay Emergency Response Team (BERT), ang nipabakwit sa mga tinun-an gamit ang mga rubber boats. (BANAT NEWS)