Gitabanga’g kulata sa grupo sa mga riders

CEBU, Philippines — Gikulata sa usa ka grupo sa mga riders sa motorsiklo ang usa ka lalaki sa viral road rage nga nahitabo sa Sitio Pung-ol, Barangay Malubog, Cebu City, niadtong alas 4 sa hapon sa Septiyembre 20.

Matud sa biktima nga residente sa maong lugar ug mihangyo nga dili ibutyag ang iyang pangalan, gikan siya sa trabaho sa dihang nakasunod siya sa usa ka grupo sa mga riders nga padung og saka sa trans-central highway.

Matud pa niya naka-overtake siya sa grupo, apan sa dihang mi-brake siya dunay kalit nga nidumbol sa luyo sa iyang motorsiklo nga maoy hinungdan sa iyang pagkatumba.

Tungod sa kadaghan sa mga sakyanan sa dalan niadtong higayona, gipili sa biktima nga ipadaplin una ang iyang motorsiklo bisan og napaso na siya sa tambutso.

 Sa interbyu sa RMN dyHP Cebu,  ang biktima niingon nga sa dihang iyahang gipahimutang iyang motor kalit siyang gituparan sa lalaking nagsakay og BMW nga motor ug walay igong hinungdan kalit siyang gisumbag niini.

Nihuboy ang ngabil sa biktima nga wala magdahum nga sumbagon siya og kalit nga igo ra siyang nagpabarog og balik sa iyang motor gikan sa pagkatumba niya tungod sa pagdumbol sa iya. Dihadiha gipangutana niya ang maong lalaki kung nganong gisumbag siya niini ug iyaha dayung gilipot ang luyo sa BMW nga motor aron pagkuha unta sa plaka, apan MV File pa ang plaka niini.

Diha na nahitabo nga gitabangan siya og kulata sa gidudahan niyang mga kauban sa naka BMW. Matud pa niya, wala na siya nakahibalo kung si kinsa ang nagtabang og kulata sa iya. Nakuyapan sab siya kay gipusposan siya og helmet diha sa ulo.

Ang maong komosyon nag-viral sa social media.  Nitabang unta ang mga ig-agaw sa biktima apan dali-daling nangikyas ang mga suspek.

Sa interbyu sa DYHP, ang biktima niingon nga mga miyembro sa Sugburado nga grupo sa mga riders sa Lapu-Lapu City ang mga nagkulata sa iya.

Sumala sa Malubog Police Station 12 ubos sa pagdumala ni PCPT Jurry M. Papasin, mitubag ang mga pulis sa nahitabo apan nangikyas na padung sa ibabaw ang mga riders nga nangulata.

Apan naay daghang naka video sa hitabo ug nakuha ang mga plaka sa mga motor sa mga niapil og pagpangulata.

Kagahapong adlawa, personal nga miadto sa Malubog Police Station 12 ang asawa sa biktima aron magpa-blotter ug gipak-kurasyonan kini.

Gipaabot nalang ang resulta  para maoy isuporta sa kasong ipasaka batok sa maong grupo.— IBM BANAT NEWS